ޖަޕާނުގައި ބޭއްވި މެރިން ޑައިވް ފެއާގައި ރާއްޖެއިން ބައިވެރިވެއްޖެ

ޖަޕާނުގެ ވެރިރަށް ޓޯކިއޯގައި ބޭއްވި 27 ވަނަ މެރިން ޑައިވް ފެއާގައި ރާއްޖެއިން ބައިވެރިވެއްޖެއެވެ.

ކޮންމެ އަހަރަކުވެސް ޖަޕާނުގެ ޓޯކިއޯގައި ބާއްވަމުން އަންނަ މި ފެއާގައި، މިފަހަރުވެސް ރާއްޖޭގެ ފަރާތުން އެންމެ އިސްކޮށް ބައިވެރިވެފައިވަނީ މޯލްޑިވްސް މާކެޓިންގ އެންޑް ޕީއާރު ކޯޕަރޭޝަން އެމްއެމްޕީއާރުސީއެވެ.
މިމަހުގެ 7 ކުން 9 އަކަށް ކުރިއަށްދިޔަ މި ފެއާގައި ރާއްޖޭގެ ޓޫރިޒަމް ސިނާއަތުގައި ހަރަކާތްތެރިވާ ގިނަ އަދަދެއްގެ ކުންފުނިތަކަކުން ބައިވެރިވެފައިވާކަމަށް އެމްއެމްޕީއާރުސީން ބުނެއެވެ.

މިފަހަރުގެ ފެއާގައިވެސް ރާއްޖޭގެ ސްޓޭންޑަށް ޒިޔާރަތްކުރި މީހުނަށް ވަނީ ރާއްޖޭ ޑައިވް މާކެޓާއި ބެހޭގޮތުން މައުލޫމާތު ދީ ތަފާތު ހަރަކާތްތައް ކުރިއަށްގެންގޮސްފައެވެ. މި ފެއާގައި ރާއްޖޭގެ ސްޓޭންޑަށް ޒިޔާރަތްކުރި މީހުނަށް މައުލޫމާތު ދީފައިވަނީ ޓޫރިޒަމް ސިނާއަތުގައި ހަރަކާތްތެރިވާ ތަޖުރިބާކާރު ބޭފުޅުންނެވެ.

މިފަހަރުގެ ޖަޕާން މެރިން ޑައިވް ފެއާގައި 50 ޤައުމަކުން 200 އަށްވުރެ ގިނަ މީހުން ވަނީ ބައިވެރިވެފައެވެ.

ޖަޕާނަކީ ދިވެހިރާއްޖޭގެ ފަތުރުވެރިކަމުގެ ސިނާއަތުގައި އެންމެ ފާހަގަކޮށްލެވޭ އެއް މާކެޓެވެ. ޖަޕާނު ހިމެނެނީ ދިވެހިރާއްޖެއަށް އެންމެގިނައިން ފަތުރުވެރިން ޒިޔާރަތްކުރާ 10 ޤައުމުގެ ތެރޭގައެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުގައި މިއަހަރުގެ ފެބުރުއަރީމަހުގެ ނިޔަލަށް ޖަޕާނުން ރާއްޖެއަށް 3،987 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު، %6.5 އިތުރުވުމެކެވެ.