ބޭންކް އޮފް މޯލްޑިވްސް އާއި ޓޯޓަލް ފިޓްނަސް ގްރޫޕް ގުޅިގެން ބާއްވާ 'ބީއެމްއެލް ވާއު ކިޑްސް ރަން' މިހިނގާ އޭޕްރިލްމަހުގެ 27 ވަނަ ދުވަހު ބޭއްވުމަށް ނިންމައިފިއެވެ.
ވާއު ކިޑްސް ރަން އާއި ގުޅޭގޮތުން ނޫސްވެރިންނަށް މައުލޫމާތުދެއްވަމުން ބޭންކް އޮފް މޯލްޑިވްސްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވީ، ވާއު ކިޑްސް ރޭހުގައި ބައިވެރިވުމުގެ ފުރުސަތު ވަރަށް އަވަހަށް ހުޅުވާލާނޭކަމަށެވެ.
މިފަދަ ދުވުމެއް ބޭއްވުމުގެ މައިގަނޑު މަގްސަދަކީ ދުޅަހެޔޮ ސިއްހަތެއްގައި ހުރުމަށް ހަރަކާތްތެރިވެ އުޅުމުގެ މުހިންމުކަން ބުނެދީ ކުދިންނާއި ބެލެނިވެރިން މިކަމަށް އަހުލުވެރިކުރުވުން ކަމަށާއި މިފަހަރުގެ ދުވުމުގައި ބީއެމްއެލް އާއި އާކް ގުޅިގެން ހަނގާކުރުން ހުއްޓުވުމަށްޓަކައި މުޖުތަމައު ހޭލުންތެރިކުރުވުމަށް ހިންގާ 'ބީޓް ބުލީންގ' ޕްރޮގްރާމަށް ފައިސާ ހަދިޔާކުރުމަށް އޮންލައިން ޕޯރޓަލެއް ޤާއިމްކޮށްފައިވާނޭކަމަށް ސައީދު ވިދާޅުވިއެވެ.
ވާއު ކިޑްސް ރަން އާއި ގުޅޭގޮތުން ޓީއެފްޖީގެ ސީއީއޯ ހުސައިން ޒިނާން ވިދާޅުވީ، މިފަހަރުގެ ދުވުމުގައި އެހެން އަހަރުތަކާއި ހިލާފަށް މި އަހަރު އިތުރު އުމުރު ފުރާއަކަށް ބައިވެރިވުމުގެ ފުރުސަތު ހުޅުވާލާފައިވާކަމަށެވެ. މި ދުވުމުގައި ބައިވެރިވެވޭނީ 4 އަހަރާއި 6 އަހަރާ ދެމެދު، 6 އަހަރާއި 8 އަހަރާ ދެމެދު، 8 އަހަރާއި 10 އަހަރާ ދެމެދުގެ އުމުރުފުރާގެ އިތުރުން 10 އަހަރާއި 13 އަހަރުގެ އުމުރު ފުރާގެ ކުދިންނަށެވެ. މިއަހަރުގެ ދުވުމުގައި 1000 ކުދިންނަށް ފުރުސަތު ދިނުމަށް ވަނީ ހަމަޖެހިފައެވެ.
މިއީ ބީއެމްއެލް ވައު ކިޑްސް ރަން ބާއްވާ ހަތަރުވަނަ އަހަރެވެ. މިފަހަރުގެ ރޭސް ބޭއްވުމަށް ނިންމާފައިވަނީ ހުޅުމާލެސިޓީގައެވެ.
ބީއެމްއެލް އިން ދަނީ އިޖުތިމާއި ޒިންމާގެ ދަށުން މިފަދަ ގިނަ ހަރަކާތަކެއްގައި ހިންގަމުންނެވެ. އެގޮތުން މިދިޔަ ފެބުރުއަރީމަހު ބޭއްވި ބީއެމްއެލް ސްޓާފް ޗެރިޓީ ރަންގައި ބީއެމްއެމްއިން ވަނީ ތެލަސީމިއާ ސޮސައިޓީއަށް 80،000 ރުފިޔާ ހަދިޔާކޮށްފައެވެ.