"އާތު އަވަރ" ނުވަތަ ބިންގަޑި ފާހަގަކުރުމަށް ރާއްޖޭގެ އެކިހިސާބުތަކުގައި ގިނަ ހަރަކާތްތަކެއް ހިންގައިފިއެވެ. އެގޮތުން އާތު އަވަރ ފާހަގަ ކުރުމުގެގޮތުން މިރޭވަނީ މާލެއާއި އަތޮޅުތަކުގެ ރަށްރަށުގެ ބައެއް ތަންތަނުގެ ބޮކިތައް އެއްގަޑިއިރަށް ނިއްވާލައި އަނދިރިކޮށްލާފައެވެ. ރޭ 8:30އިން 9:30އަށް ބޮކިތައް ނިއްވާލުމުގައި ގިނަބަޔަކު ބައިވެރިވެފައިވެއެވެ.
އާތު އަވަރ ފާހަގަކުރުމުގެ މައިޙަރަކާތް އޮތީ މިރޭ ހދ.ކުޅުދުއްފުށީގައެވެ. އަދި މިއަދު ހަވީރު އެރަށުގައި ވަނީ ޚާއްސަ ހިނގާލުމެއްވެސް ބާއްވާފައެވެ. މިހިނގާލުމުގައި ސްކޫލް ދަރިވަރުންނާއި މުދައްރިސުން ބައިވެރިވެ، ޝުޢޫރުފާޅުކޮށްފައިވެއެވެ. އެގޮތުން ތިމާވެއްޓަށް ލިބޭ އެކިއެކި ގެއްލުންތަކުގެ ސަބުން ދުނިޔެއަށްކުރާ ނޭދެވޭ އަސަރުތަކާބެހޭ ޝުޢޫރުތައް ލިޔެފައިވާ ބޯޑުތައް މިހިނގާލުމުގެ ބައިވެރިން ވަނީ އުފުލާފައެވެ.
ކުޅުދުއްފުށީގައި މިރޭ އާތު އަވަރ ފާހަގަކުރުމުގެގޮތުން ވަނީ ތަފާތު ޙަރަކާތްތަކެއް ކުރިއަށް ގެންގޮސްފައެވެ. އެގޮތުން ގިނަބަޔަކުވަނީ ކަނރަންޓުގެ އަލިތައް ނިއްވާލައި އުއްބައްތިއާއެކު ވަގުތުހޭދަކޮށްފައެވެ. މިޙަރަކާތުގެ ތެރެއިން މުނިފޫހިފިލުމުގެ އައިޓަމްތައްވެސް ކުރިއަށް ގެންގޮސްފައިވެއެވެ.
އާތު އަވަރ ފާހަގަކުރުމަށް ހއ.ދިއްދޫގައިވެސް އެކި ހަރަކާތްތައް ހިންގައިވެއެވެ. އެގޮތުން މިއަދު ހަވީރު ދިއްދޫގެ ސްކޫލްކުދިންނާއި މުއައްސަސާތަކުގެ މުވައްޒަފުންނާއި ޢާއްމުންވަނީ ހިނގާލުމެއް ބާއްވާފައެވެ. މިހިނގާލުމުގައި އެރަށުރައްޔިތުންވެސްވަނީ ތިމާވެއްޓަށް ގެއްލުންހުރި ކަންކަމުން ދުރުހެލިވުމަށް ގޮވާލައި ޝުޢޫރު ފާޅުކޮށްފައެވެ.
އެހެން ބައެއް އަތޮޅުތަކަށް ބަލާއިރު، ބ.އޭދަފުށީގައިވެސް މިޙަރަކާތް ކުލަގަދަކޮށް ކުރިއަށް ގެންގޮސްފައިވާކަން ފާހަގަކުރެވެއެވެ. އޭދަފުށީގައިވެސް ސްކޫލްކުދިންނާއި އެރަށުގެ އެކި މުއައްސަސާތަކުގެ މުވައްޒަފުންނާއި ޢާއްމުންވަނީ ކަރަންޓުގެ ވަޞީލަތްތަކުގެ ސުވިޗް އޮފްކުރުމަށް ގޮވާލައި މިއަދު ހަވީރު ހިނގާލުމެއް ބާއްވާފައެވެ. މީގެއިތުރުން އެއަތޮޅު ތަޢުލީމީ މަރުކަޒުންގެ ދަރިވަރުންވަނީ، މިރޭ ކަރަންޓުގެ އަލިތައް ނިއްވާލައި އާތު އަވަރ ފާހަގަކޮށްފައެވެ.
މީގެ އިތުރުން ރާއްޖޭގެ އެންމެ ދެކުނުން ފުވައްމުލައް ސިޓީގައިވެސް ވަނީ މިޙަރަކާތް ކުލަގަދަކޮށް ކުރިއަށްގެންގޮސްފައެވެ. އެސިޓީގައި ކުރިއަށް ގެންދިޔަ ޙަރަކާތުގައިވެސް ސްކޫލްތަކުގެ ދަރިވަރުންނާއި ޢާއްމުން ބައިވެރިވިއެވެ.
އެކި ރަށްރަށުގައި މިއަދު ހަވިރު ކުރިއަށްގެންދިޔަ ހިނގާލުމަކީ އާތު އަވަރ މޯލްޑިވްސްއާއި އެޑިއުކޭޝަން މިނިސްޓްރީއާއި އެންވަޔަރްމަންޓް މިނިސްޓްރީ ގުޅިގެން މުޅި ރާއްޖޭގައި ކުރިއަށްގެންދިޔަ ހިނގާލުންތަކެއްކަމަށް އާތު އަވަރ މޯލްޑިވްސްއިން މަޢުލޫމާތުދެއްވައެވެ.
އާތު އަވަރ ފާހަގަކުރުމަށް މާލޭގައި އެންމެ ބޮޑު ޙަރަކާތެއް ކުރިއަށްގެންދިޔައީ މާފަންނު ސްޓޭޑިއަމް ސަރަޙައްދުގައެވެ. ލައިވް މިއުޒިކާއެކު ކުރިއަށްގެންދިޔަ މިޙަރަކާތުގައި ގިނަބަޔަކު ބައިވެރިވެފައިވެއެވެ. މީގެއިތުރުން މާލޭގައިވެސްވަނީ ޚާއްސަ ހިނގާލުމެއްވެސް ބާއްވާފައެވެ.
އާތު އަވަރ އަކީ ތިމާވެއްޓަށްވަމުނދާ ގެންލުންތަކަށް ޢާއްމުން ހޭލުންރިކުރުވައި، އެކަންކަން ދުނިޔޭގެ ސަމަލުކަމަށް ގެންނައުމަށް ހުރިހާ ޤައުމުތައް ހިމެނޭގޮތަށް ފާހަގަކުރަމުން އަންނަ ޚާއްސަ ޙަރަކާތެކެވެ.
2009ވަނަ އަހަރު ފެށިގެން ރާއްޖޭގައިވެސް އަންނަނީ އާތު އަވަރ ފާހަގަކުރަމުންނެވެ.