މަނީ ލޯންޑަރިންގެ މައްސަލައިގެ ޝަރީއަތް ނިމެންދެން، ހައްޔަރުކޮށްފައި ބެހެއްޓުމަށް ކްރިމިނަލް ކޯޓުންކުރި އަމުރު ބާތިލްކޮށް، ކުރީގެ ރައީސް ޢަބްދުﷲ ޔާމީން މިނިވަންކުރުމަށް ހައިކޯޓުން އަމުރުކޮށްފިއެވެ.
މިދިޔަ މަހުގެ އަށާރަވަނަދުވަހު ކްރިމިނަލް ކޯޓުން ކުރި އަމުރު ރައީސް ޔާމީންގެ ފަރާތުން ހައިކޯޓުގައި އިސްތިއުނާފުކުރުމުން މިމައްސަލަ ނިންމާ ހައިކޯޓުން ކުރި ހުކުމްގައި މައިގަނޑު ތިން ކަމެއް ފާހަގަކޮށްފައިވެއެވެ. މިގޮތުން ޝަރީއަތަކާއި ނުލާ މީހަކު ބަންދުގައި ބެހެއްޓޭނީ 30 ދުވަހުގެ މުއްދަތަށްކަމަށާއި ކްރިމިނަލް ކޯޓުގެ އަމުރަށް ބަލާލުމުން ޔާމީން ބަންދުގައި ހުންނަތާ ތިރީސް ދުވަސް ހަމަވާ ތާރީޚަކީ އަށާރަ މާރިޗްގެ 15:54 ކަމުން އެ މުއްދަތު މިހާރު ހަމަވެފައިވާތީ، ޔާމީން ބަންދުގައި އިތުރަށް ބެހެއްޓޭނެ ސަބަބެއްނެތްކަމަށް މައްސަލަ ބެެއްލެވި ހައިކޯޓުގެ ފަނޑިޔާރުންގެ ބެންޗްގެ އިއްތިފާޤުން އިއްވެވި ޙުކުމްގައިވެއެވެ.
ހައިކޯޓްގެ ހުކުމްގައި ވަނީ ޔާމީނާއި ދެކޮޅަށް ކްރމިނަލް ކޯޓަށް ހުށަހަޅާފައިވާ މަނީ ލޯންޑްރިންގގެ މައްސަލައިގެ ހެކިންނަށް ޔާމީން ނުފޫޒު ފޯރުވާފައިވާކަމަށް ދައުލަތުން ބުނާއިރު އެފަދަ އެއްވެސް ހެއްކެއް މިހާތަނަށް ޔާމީނާއި ދެކޮޅަށް ލިބިފައިނުވާކަމަށް ދައުލަތުގެ ފަރާތުންނާއި މޯލްޑިވްސް ޕޮލިސް ސަރވިސްގެ ފަރާތުން ދިވެހިރާއްޖޭގެ ހައިކޯޓުގައި ބުނެފައިވާކަމަށެވެ. ޢަދި މައްސަލައިގައި ހިމެނޭ ހެކިންނަށް ނުފޫޒު ފޯރުވާފައިވާކަން ދައުލަތުގެ ފަރާތުން ހުށައަޅާފައިވާ ލިޔެކިއުންތަކުން އެނގެން ނެތުމުން ޔާމީން ބަންދުގައި ބެހެއްޓުމަށް ކޮށްފައިވާ އަމުރު ބާޠިލުކުރާކަމަށްވެސް ހައިކޯޓްގެ ހުކުމްގައިވެއެވެ.
ހައިކޯޓުން މިމައްސަލައިގެ ހުކުމް އިއްވާފައި މިވަނީ އެ މައްސަލަ ބަލަމުން ދިޔަ ބެންޗް ބަދަލުކުރުމަށްފަހުއެވެ.
މަނީ ލޯންޑަރިންގެ ކުށުގެ ތުހުމަތުގައި ޝަރީޢަތް ނިމެންދެން ޖަލުގައި ބަންދުކޮށްފައި ހުންނެވިނަމަވެސް ބަލިހާލަތު ހުރިގޮތުން، ޑޮކްޓަރުގެ ލަފާދެއްވާފައިވާތީ ކުރީގެ ރައީސް ޔާމީން މިހާރު ހުންނެވީ ގޭބަންދަށް ބަދަލުކޮށްފައެވެ.