ރާއްޖޭގެ ފަތުރުވެރިކަން އިޝްތިހާރު ކުރުމަށް ވިއެޓްނާމްގައި ބާއްވާ ފަތުރުވެރިކަމުގެ ބޮޑު ފެއަރއެއްގައި ރާއްޖެއިން ބައިވެރިވެއްޖެއެވެ.
'ވިއެޓްނާމް އިންޓަރނޭޝަނަލް މާރޓް'ގައި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް، މަޓާޓޯ އާއި އެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 3 ކުންފުންޏަކުން ވަނީ ބައިވެރިވެފައެވެ.
މިމަހުގެ ހަތާވީހުން ތިރީހަށް ވިއެޓްނާމްގެ ވެރިރަށް ހެނޯއީގައި ކުރިއަށްދާ މި ފެއަރ މެދުވެރިކޮށް، ދެކުނު އިރުމަތީ އޭޝިއާގެ ޤައުމުތަކުގައި ރާއްޖެ އިތުރަށް އިޝްތިހާރުވެ ޕްރޮމޯޓުކުރެވެގެންދާނެ ކަމަށް މަޓާޓޯއިން ދެކެއެވެ.
މިއަހަރުގެ ފެއަރގައި ފަންސަވީހަށް ވުރެ ގިނަ ޤައުމަކުން ފަތުރުވެރިކަމުގެ ސިނާއަތުގައި ހަރަކާތްތެރިވާ ގިނަ އަދަދެއްގެ ފަރާތްތަކަކުންވަނީ ބައިވެރިވެފައެވެ. މި ފެއަރއަށް 85،000 ވުރެ ގިނަ މީހުން ޒިޔާރަތްކުރާނެ ކަމަށް ވަނީ ލަފާކޮށްފައެވެ.
' ވިއެޓްނާމް އިންޓަރނޭޝަނަލް މާރޓް'ގައި މިދިޔަ އަހަރުވެސް މަޓާޓޯއިންވަނީ ބައިވެރިވެފައެވެ. މިދިޔަ އަހަރު މަޓާޓޯއާއި އެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 6 ކުންފުންޏަކުން ވަނީ ބައިވެރިވެފައިވެއެވެ.
ވިއެޓްނާމް ހިމެނެނީ ރާއްޖެއަށް ފަތުރުވެރިން އަންނަ އަދަދު އިތުރުވަމުންދާ ޤައުމުތަކުގެ ތެރޭގައެވެ. އެގޮތުން ހުސްވި އަހަރު ވިއެޓްނާމުން ރާއްޖެއަށް 5،000 ވުރެ ގިނަ ފަތުރުވެރިން ޒިޔާރަތްކޮށްފައިވާއިރު، މިއީ 2017 ވަނަ އަހަރާއި އަޅާ ބަލާއިރު، %15 އިތުރު އަދަދެކެވެ.
މަންޒިލެއްގެ ގޮތުގައި ރާއްޖޭގެ ފަތުރުވެރިކަން ދުނިޔޭގެ އެކި ހިސާބުތަކުގައި އިޝްތިހާރުކޮށް، ދިވެހި ކުންފުނިތަކަށް އެކި ޤައުމުތަކުގައި ބާއްވާ ފެއަރތަކުގައި ބައިވެރިވުމުގެ ފުރުސަތު ފަހިކޮށް ދިނުމަށްޓަކައި މަޓާޓޯއިން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން މިއަހަރުތެރޭ 15 ފެއަރއެއްގައި ބައިވެރިވުމަށް އެސޯސިއޭޝަނުންވަނީ ނިންމާފައެވެ.