ޤައުމުގެ ތަރައްޤީއަށް އާރޓިފިޝަލް އިންޓަލިޖަންސް ފަދަ ޓެކްނޮލޮޖީތައް މުޙިއްމު- މިނިސްޓަރ މަލީޙް
ޤައުމުގެ ތަރައްޤީއަށް އާރޓިފިޝަލް އިންޓަލިޖަންސް ފަދަ ޓެކްނޮލޮޖީތައް މުޙިއްމުކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލް ވިދާޅުއްޖެއެވެ.
ރާއްޖެއިން ކުރާ ބައިނަލްއަޤްވާމީ ވިޔަފާރީގެ މުއާމަލާތްތަކުގައި 'ބްލޮކް ޗެއިން' ޓެކްނޮލޮޖީ ބޭނުންކުރުމާއި ގުޅޭ މަސައްކަތު ބައްދަލުވުން ފައްޓަވައިދެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ މަލީޙް ވިދާޅުވީ، ޤައުމު ތަރައްޤީކުރުމަށް މަސައްކަތްކުރާއިރު، އެކި ކަންކަމުގައި އެންމެ ޒަމާނީ ޓެކްނޮލޮޖީގެ ބޭނުންހިފަން ޖެހޭކަމަށެވެ.
މިގޮތުން ޤައުމަށް ބޭނުންވާ ހަޤީޤީ ތަރައްޤީ ގެނެވޭނީ ޒާމާނީ ޓެކްނޮލޮޖީތަކުގެ ބޭނުން އެންމެ ފުރިހަމައަށް ހިފައި، އޭގެ ފަސޭހަކަން ރައްޔިތުންނާއި ހަމަޔަށް ގެނެސްދީގެންކަމަށް މިނިސްޓަރު ވިދާޅުވިއެވެ.
"ބްލޮކްޗެއިން ޓެކްނޮލޮޖީ އެޕްލިކޭޝަން ޓު އިންޓަރނޭޝަނަލް ޓްރޭޑް" ގެ ނަމުގައި ބާއްވާ މަސައްކަތު ބައްދަލުވުމަކީ އޭޝިއަން ޑިވެލޮޕްމަންޓް ބޭންކް، އޭ.ޑީ.ބީ ގެ އެހީތެރިކަމާއިއެކު ތަންފީޒްކުރުމަށް ހަމަޖެހިފައިވާ ބްލޮކް ޗެއިން ޓެކްނޮލޮޖީގެ ޕައިލެޓް ޕްރޮޖެކްޓުގެ މަސައްކަތްތައް ފެށުމަށްޓަކައި، ބައިނަލްއަޤްވާމީ ވިޔަފާރީގެ މުޢާމަލާތްތަކުގައި ބްލޮކްޗެއިން ޓެކްނޮލޮޖީ ބޭނުންކުރުމާއި ގުޅޭގޮތުން ބާއްވާ މަސައްކަތު ބައްދަލުވުމެކެވެ.
މި މަސައްކަތު ބައްދަލުވުމުގައި މައުލޫމާތު ދިނުމަށް ހަމަޖެހިފައިވަނީ އައި.ބީ.އެމް އިންޑިއާގައި މަސައްކަތްކުރައްވާ ތަޖުރިބާކާރު ބޭފުޅުންނާއި އޭ.ޑީ.ބީ ކޮންސަލްޓަންޓުންނެވެ. މި މަސައްކަތު ބައްދަލުވުމުގައި ސަރުކާރުގެ ގުޅުންހުރި އިދާރާތަކާއި، ވިޔަފާރީ ދާއިރާގައި ހަރަކާތްތެރިވާ ކުންފުނިތަކާއި އަދި އައި.ސީ.ޓީ ދާއިރާގައި މަސައްކަތްކުރާ 50 ފަރާތްތަކުން ބައިވެރިވެއެވެ.