އަންނަ މެއިމަހުގެ ނިޔަލަށް ރާއްޖޭގެ ހުރިހާ ސަރަޙައްދަށް ހޫނު ގަދަވާނެކަމަށް ލަފާކުރެވޭތީ އެކަމަށް ސަމާލުވުމަށް އެޗްޕީއޭއިން އިލްތިމާސްކޮށްފިއެވެ. އެޗްޕީއޭއިސްވަނީ ހޫނުން ރައްކާތެރިވުމަށްޓަކައި ޚާއްސަ ފިޔަވަޅުތައް އެޅުމާއި، ހޫނުގެ ސަބަބުން ދިމާވެދާނެ ސިއްޙީ މައްސަލަތައް ކުޑަކުރުމަށް ފިޔަވަޅުއެޅުމަށް އެދިފައެވެ.
މޫސުމާބެހޭ ޤައުމީ އިދާރާއިން ވިދާޅުވާގޮތުގައި ކޮންމެ އަހަރަކުވެސް އޭޕްރިލްމަހަކީ އެވަރެޖްކޮށް ރާއްޖެއަށް އެންމެ ހޫނުގަދަވާ ދުވަސްވަރެވެ. މެޓް އޮފީހުން ބުނެފައިވަނީ މިއީ އިރުވައި މޫސުމުގެ ހޫނުކަމަށާއި، ރާއްޖޭގެ އެކި ހިސާބުތަކުން އެއްކުރަމުންއަންނަ މަޢުލޫމާތުތައް ދައްކާގޮތުން، ހުރިހައި ހިސާބުތަކެއްގެވެސް ހޫނުމިން އެވަރެޖްކޮށް އުޅެނީ 32ޑިގްރީއާއި، 33ޑިގްރީ ސެލްސިއަސްގައިކަމަށެވެ.
އަދި އޭޕްރިލްމަހު މިހާރަށްވުރެ އިތުރަށް ހޫނު ގަދަވާނެކަމަށް މޫސުމާބެހޭ ޤައުމީ އިދާރާއިންވަނީ ވިދާޅުވެފައެވެ. އެހެންނަމަވެސް އާދަޔާޚިލާފައި ހޫނުގަދަވާ މިންވަރަށް ރާއްޖޭގެ ފިނިހޫނުމިން މައްޗައް ނުދާނެކަމަށް އެއިދާރާއިން ވިދާޅުވެއެވެ.
މިދުވަސްވަރަކީ މުޅި ރާއްޖެއަށް ހޫނުގަދަ ދުވަސްތަކަކަށްވާނެތީ އެކަމަށް ސަމާލުވުމަށް ހެލްތް ޕްރޮޓެކްޝަން އެޖެންސީ )އެޗްޕީއޭ(އިންވަނީ އިލްތިމާސްކުރައްވާފައެވެ. އެޗްޕީއޭއީން ވިދާޅުވެފައިވަނީ ހޫނުގަދަވުމުގެ ސަބަބުން، ވަރުދެރަވުމާއި ބޮލުގައި ރިއްސައި ބޯއެންބުރުމާއި އަތްފައި ފިނިވުމާއި އަކުނިވަޔަށްދެމުންފަދަ ކަންކަން ކުރިމަތިވުމަކީ ގާތްކަމެއްކަމަށެވެ.
އަދި ގިނަ ވަގުތު އަވީގައި އުޅުމުގެ ސަބަބުން ލޮލުގެ މަތީ ފަށަލަ ފިހުމާއި، ލޮލުގެ އެތެރެ ފަށަލަ ހަލާކުވުމާއި، ލޯ ފުސްވުން ކަހަލަ ކަންކަން ދިމާވުން އެކަށީގެންވާ ކަމަށްވެސް އެޗްޕީއޭއިން ވިދާޅުވެއެވެ. އަދި ހޫނުގެ ސަބަބުން ގައިގެ ހަންގަނޑު އެނދުމުގެ ސަބަބުން ރަތްވުމާއި، ފޮޅުނެގުމާއި، ކުދި ރަތް ބިހު ނެގުމަކީވެސް ގާތްކަމެކެވެ.
މިކަންކަމުގެތެރެއިން ގައިން ވަރުދެރަވެ ބޯ އަނބުރާގޮތްވާނަ، މަސައްކަތް ހުއްޓާލާފައި ފިނި ތަނެއްގައި މަޑުކުރުމަކީ ސިއްހީ އެހީދޭ ފަރާތްތަކުން ލަފާދޭ، ކުރުން މުހިންމު ކަމެކެވެ. ނަމަވެސް ވަރުދެރަވެ، ބޮލުގައި ރިއްސައި ބޯއެނބުރުމާއި، އަކުނިވަޔަށްދެމުންފަދަ ކަމެއްވާނަމަ ލަސްނުކޮށް ސިއްޙީ ފަރުވާހޯދުމަށް އެޗްޕީއޭއިން އިލްތިމާސްކުރައްވައެވެ.
ގަދަ ހޫނުގެ ސަބަބުން ދިމާވެދާނެ ސިއްޙީ މައްސަލަތައް ކުޑަކުރުމަށް ކުރެވިދާނެ ކަންކަމުގެ ތެރޭގައި، އެންމެ ހޫނުގަދަ ގަޑިތަކުގައި އަތްވަށް ނިކުންނަ މިންވަރު ވީހާވެސް މަދުކުރުމާއި، ހަށިގަނޑުގައި ފެން މަދުވިޔަ ނުދިނުމަށް ގިނައިން ފެންބުއިމާއި ބޭރުގައި ކުޅިވަރު ކުޅުންފަދަ ކަންކަން ކުރުމުގެ ބަދަލުގައި، އެތެރޭގައި ނުވަތަ އަވި ނުދޭ ވަގުތުތަކުގައ މިފަދަ ހަރަކާތްތައް ހިންގުމާއި، ހަކުރާއި ކެފެއިންފަދަ ބާވަތްތައް ހިމެނޭ ބުއިންތައް ބޭނުންކުރުން މަދުކުރުން ހިމެނެއެވެ. އަދި އަތްވައް ނިކުންނަނަމަ އަވިއައިނު ބޭނުންކުރުމާއި ސަން ބްލޮކް ލޯޝަން ބޭނުންކުރުމާއި އަވިން ރައްކާތެރިވުމަށް ކުޑަ ބޭނުންކުރުމާއި ކުލަ މަޑު ހަށިގަނޑު ބޮޑަށް ނިވާވާފަދަ ދޫ ހެދުން ބޭނުންކުރުމަކީ މުހިންމުކަމެއްކަމަށް އެޗްޕީއޭއިންވަނީ ވިދާޅުވެފައެވެ.
މެޓް އޮފީހުން ބުނެފައިވަނީ މެއިމަހުގެ މެދު ހިސާބުގައި ހުޅަނގު މޫސުން ފެށެންދެން ރާއްޖެއަށް ހޫނު ގަދަވާނެކަމަށެވެ. މެޓް އޮފީހުގެ ތަފާސްހިސާބުތައް ދައްކާގޮތުން ދެހާހުގެ އަހަރުތަކުގައި ރާއްޖެއަށް އެންމެ ބޮޑަށް ހޫނުގަދަވެފައިވަނީ 2016ވަނަ އަހަރު، ރައްޖޭގެ އުތުރަށެވެ. އެއީ 2016ވަނަ އަހަރުގެ އޭޕްރިލް މަހުގެ 16ވަނަ ދުވަހު، 35 ޑިގްރީ ސެސްލިއަސްއަށެވެ.
މިހާތަނަށް ރާއްޖެއަށް އެންމެ ބޮޑަށް ހޫނުގަދަވެފައިވަނީ 1991ވަނަ އަހަރުގެ ސެޕްޓެމްބަރުމަހުއެވެ. އެއަހަރުވަނީ 36.8 ޑިގްރީ ސެލްސިއަސްއަށް ފިނިފޫނުމުން އުފުލިފައެވެ.