މާލެ ކައިރީގައި އޮންނަ ފޮނަދޫއިން މާލެއަށް 100 އަންހެނުން ފެތުމުގެ ހަރަކާތެއް ކުރިއަށް ގެންދަން ނިންމައިފިއެވެ.
އަންހެނުންގެ ދުވަހުގެ މުނާސަބަތާއި ގުޅިގެން މޯލްޑިވްސް ލައިފް ގާޑް އެސޯސިއޭޝަނުން އިސްނަގައިގެން ހިންގާ މި ހަރަކާތަކީ އާންމުކޮށް ހުޅުވާލައިގެން ކުރިއަށްގެންދާ ހަރަކާތެކެވެ.
"ބްރޭކް ދަ ބެރިއާ" މި ޝިއާރުގެ ދަށުން ހިންގާ މި ހަރަކާތަކީ ހަމައެކަނި އަންހެނުން ބައިވެރިވެގެން ކުރިއަށް ގެންދާ ހަރަކާތެއް ކަމަށް ލައިފް ގާޑް އެސޯސިއޭޝަނުން ބުނެއެވެ.
ލައިފްގާޑް އެސޯސިއޭޝަނުން ބުނީ މި ފެތުމަކީ މުބާރާތެއް ނޫންކަމަށާއި އަދި އެއީ ޗެލެންޖެއްވެސް ނޫންކަމަށެވެ. އަދި މި ހަރަކާތުގައި އެކި ދާއިރާތަކުގައި މަސައްކަތް ކުރާ އެކި އުމުރުގެ އަންހެނުން ބައިވެރިވުމަށް ވަނީ ހަމަޖެހިފައެވެ.
މޯލްޑިވްސް ލައިފް ގާޑް އެސޯސިއޭޝަނުން ބުނީ އަމާޒަކީ އެފަދަ ހަރަކާތެއް ކުރާތަން ފެނުމުން އިތުރު ބަޔަކުވެސް އެކަމަށް ޝައުގުވެރިވެ ފަތަން ދަސްކުރަން ޝައުގުވެރި ކުރުވުން ކަމަށެވެ. އަދި އަންހެނުންނަށް ކޮންމެ ކަމެއްވެސް ވާނެކަން ސާބިތުކޮށްދިނުމަކީވެސް އެކަމުގެ އަމާޒެއް ކަމަށް އެ އެސޯސިއޭޝަނުން ބުނެއެވެ.
މި ހަރަކާތް ކުރިއަށްގެންދިއުމަށް ހަމަޖެހިފައިވަނީ މި މަހުގެ 30ވަނަ ދުވަހުގެ 3:00 ގައެވެ. އަދި ފުނަދޫއިން ފެތުންތެރިން ފުންމާލަން ހަމަޖެހިފައިވަނީ އެދުވަހުގެ 4:00ގައެވެ.