ގޯލާން އުސްބިންތަކުގެ މައްސަލައިގައި އެމެރިކާއިން ނިންމި ނިންމުމާ ދެކޮޅަށް ދުރޫޒުން މުޒާހަރާކޮށްފި

1967 ވަނަ އަހަރު އިސްރާއީލުން އަތުލައިގަތް ސޫރިޔާގެ ގޯލާންގެ އުސްބިންތަކަކީ އިސްރާއީލުގެ ސަރަހައްދުތަކެއްގެ ގޮތުގައި ކަނޑައެޅުމަށް ގޮވާލާ އެމެރިކާގެ ރައީސް ޑޮނަލްޑް ޓްރަމްޕް ދައްކަވާފައިވާ ވާހަކަތަކާ ދެކޮޅަށް އެ ސަރަހައްދުގައި ދިރިއުޅޭ ޢަރަބިން މުޒާހަރާކޮށްފިއެވެ.

އދގެ އިންސާނީ ހައްޤުތަކާ ބެހޭ އިދާރާއިން، މި ހަފުތާބަންދުގައި މިވަނީ، އިސްރާއީލުން ގޯލާންގެ އުސްބިންތަކުގައި ޔަހޫދީން ވަޒަންވެރިކުރުމަށް ކުރިއަށްގެންދާ މަޝްރޫޢުތައް ހުއްޓުވުމަށް ގޮވާލާ ޤާރާރެއް ފާސްކޮށްފައެވެ. 1967 ވަނަ އަހަރު ކުރި މެދުއިރުމަތީގެ ހަނގުރާމައިގައި އިސްރާއީލުން ސޫރިޔާގެ އަތުން އަތުލި ގޯލާންގެ އުސްބިންތައް އެ ޤައުމުގެ ސަރަހައްދެއްގެ ގޮތުގައި ކަނޑައަޅާ ވަކިކޮށްފައިވަނީ 1981 ވަނަ އަހަރުގައެވެ.

އެހެންނަމަވެސް އިސްރާއީލުގެ މި ނިންމުމަކީ ބައިނަލްއަޤުވާމީ ދުނިޔެ ބަލައިގަންނަ ނިންމުމެއް ނޫނެވެ. މިކަމަކީ، މި ފަހަކާ ޖެހެންދެން އެމެރިކާއިންވެސް ބަލައިގަތުމަށް ދެކޮޅުހަދާފައިވާ ކަމަކަށްވާހިނދު އިސްރާއީލާ ގުޅުންހުރި އެހެން ކަންކަމުގައި އެމެރިކާގެ ރައީސް ޑޮނަލްޑް ޓްރަމްޕް، އެ ޤައުމުގެ ދުވަސްވީ ސިޔާސަތުތަކަށް ބަދަލު ގެނެސްފައިވާ ފަދައިން، މިކަމަށްވެސް މިވަނީ ބަދަލު ގެންނަވާފައެވެ.

މި ގޮތުން ބުރާސްފަތި ދުވަހު ކުރެއްވި ޓްވީޓެއްގައި އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެފައިވަނީ، ފަންސާސް ދެ އަހަރަށް ފަހު، ގޯލާންގެ އުސްބިންތަކަކީ އިސްރާއީލުގެ ފުރިހަމަ ބާރާއި ސިޔާދަތު ހިނގާ ސަރަހައްދެއްކަމަށް އެމެރިކާއިން މުޅިން ބަލައިގަނެ، އެކަން އިއުލާނުކުރަން ޖެހޭކަމަށެވެ.

އަދި މި ސަރަހައްދަކީ އިސްރާއީލުގެ ސަލާމަތާއި ރައްކާތެރި ކަމަށްވެސް މުހިއްމު ސަރަހައްދެއް ކަމަށް ޓްރަމްޕް ވިދާޅުވިއެވެ. މިކަމާ ދެކޮޅަށް ބައިނަލްއަޤުވާމީ މުޖުތަމަޢުގެ ގިނަ ބާރުތަކުން ވާހަކަދައްކާފައިވާއިރު ތުރުކީވިލާތާއި މެދު އިރުމަތީގެ ޤައުމުތަކުން ބުނެފައިވަނީ އެމެރިކާއިން މި ގޮތަށް ނިންމުން ވެގެންދާނީ، މެދުއިރުމަތީގައި އިތުރު ހަމަނުޖެހުންތަކެއް އުފެދިގެންދާނެ ކަމަކަށްކަމަށެވެ.

އަނެއްކޮޅުން، ވިލާތުގެ އިއްތިހާދުން ބުނެފައިވަނީ އެމެރިކާއިން މިކަމުގައި ގެންގުޅޭ ސިޔާސަތު ބަދަލުކުރި ނަމަވެސް، ވިލާތުގެ އިއްތިހާދުން މި މައްސަލައިގައި ގެންގުޅޭ ސިޔާސަތު ބަދަލުނުކުރާނޭކަމަށެވެ. ސޫރިޔާއިން ބުނެފައިވަނީ ގޯލާންގެ އުސްބިންތައް އަލުން ސޫރިޔާގެ ސަރަހައްދަކަށް ހެދުމަކީ އެ ޤައުމުން އަދި ވެސް އަހައްމިއްޔަތުކަން ދޭކަމެއް ކަމަށާއި، ގަދަ ބާރުންވެސް މިކަން ކުރުމަށް ތައްޔާރަށް އޮތްކަމަށެވެ.

ހޮނިހިރު ދުވަހު، ގޯލާންގެ އުސްބިންތަކުގައި ދިރުއުޅޭ ދުރޫޒް ޢަރަބި ނަސްލުގެ އެތައް ސަތޭކަ ބަޔަކު ވަނީ މުޒާހަރާކޮށްފައެވެ. މުޒާހަރާގެ ބައިވެރިން ވަނީ، މި ސަރަހައްދަކީ އިސްރާއީލުގެ ސަރަހައްދެއްގެ ގޮތުގައި ބަލައިގަތުމަށް އެމެރިކާއިން ނިންމާފައިވާ ނިންމުމާ ދެކޮޅަށް އަޑުއުފުލާފައެވެ. އަދި މި ސަރަހައްދަކީ އަބަދުވެސް ސޫރިޔާގެ ސިޔާދަތު ހިނގާނެ، ސޫރިޔާގެ މިލްކިއްޔާތެއް ކަމަށްވެސް އެ ފަރާތްތަކުން ވަނީ ބުނެފައެވެ.

ހުކުރު ދުވަހު އދގެ އިންސާނީ ހައްޤުތަކާ ބެހޭ އިދާރާއިން ވަނީ، އިސްރާއީލުން ގޯލާންގެ އުސްބިންތަކުގައި ޔަހޫދީން ވަޒަންވެރިކުރުމަށް ކުރިއަށްގެންދާ މަޝްރޫޢުތައް ހުއްޓުވުމަށް ގޮވާލާ ޤާރާރެއްވެސް ފާސްކޮށްފައެވެ. މި އިދާރާއިން ކޮންމެ އަހަރަކުވެސް ވޯޓުލާ މި ޤަރާރު، މި އަހަރު ހުށަހަޅާފައިވަނީ ޕާކިސްތާނުންނެވެ.