ދައުލަތަށް ގިނަ ދުވަހު ހިދުމަތް ކުރެއްވި ޢިއްޒަތްތެރިއެއްކަމަށްވާ ނިޝާން ޢިއްޒުއްދީންގެ ޢިއްޒަތުގެ ވެރިޔާ، ހ.ބުރެވިމާގޭ މުހައްމަދު ޒާހިރު އަވާހަރަވެއްޖެއެވެ.
މަޢުލޫމާތު ލިބިފައިވާގޮތުގައި ޒާހިރު އަވަހާރަވީ ރޭ 11:30 ހާއިރު އައިޖީއެމްއެޗް ގައެވެ. އަވަހާރަވީ ކުއްލިއަކަށް ޖެހިވަޑައިގެންނެވި އާލާސްކަންފުޅަކަށް ފަރުވާ ހޯއްދަވަމުންދަނިކޮށެވެ.
މުޙައްމަދު ޒާހިރަކީ މެދުނުކެނޑި 63 އަހަރަށްވުރެ ގިނަދުވަހު ދައުލަތަށް ޚިދްމަތް ކުރައްވާފާއިވާ ބޭފުޅެކެވެ. ޒާހިރު ސަރުކާރަށް ޚިދުމަތްކުރައްވަން ފެށްޓެވީ 5 އޮގަސްޓު 1942 ގައެވެ. ފުރުއްވި މަޤާމުތަކުގެ ތެރޭގައި މަޙްކަމަތުއް ދާޚިލިއްޔާގެ ކާތިބުކަމާއި ވަޒީރުލްއަޢުޡަމްގެ ޚާއްޞަ ސެކްރެޓަރީ ކަމާއި ވަޒީރުންގެ މަޖިލީހުގެ ސެކްރެޓަރީ ކަމާއި ޓެލެކޮމިއުނިކޭޝަން ޑިޕާޓްމަންޓްގެ ވެރިޔާގެ މަޤާމާއި ކަސްޓަމްސްގެ ވެރިޔާގެ މަޤާމު ހިމެނެއެވެ. މީގެއިތުރުން ކުރީގެ ރައީސް އިބްރާހީމް ނާޞިރުގެ ޕްރައިވެޓް ސެކްރެޓަރީގެ މަގާމު ވެސް އޭނާވަނީ އަދާކުރައްވާފައެވެ. މީގެއިތުރުން މިނިސްޓަރ އޮފް ފިޝަރީޒްގެ ނައިބުކަމާއި ޕްރިންސިޕަލް ކަލެކްޓަރ އޮފް ކަސްޓަމްސްގެ މަގާމާއި މިނިސްޓަރ އޮފް ސްޓޭޓް ކަމުގެ މަގާމު އަދާކުރައްވާފައިވެއެވެ. އަދި ފާދިއްޕޮޅު އަތޮޅުވެރިކަމާއި އައްޑުއަތޮޅު އަތޮޅުވެރިކަމާއި ތިލަދުންމަތީ އަތޮޅުވެރިކަންވެސް ޒާހިރު ވަނީ ކުރައްވާފައެވެ. އަދި ރައްޔިތުންގެ މަޖިލީހުގެ ފުވައްމުލަކު މެންބަރުކަމާއި ފާދިއްޕޮޅު މެންބަރުކަމާއި ކޮޅުމަޑުލު މެންބަރުކަންވެސް ވަނީ ކުރައްވާފައެވެ.
ޒާހިރަކީ ރައީސް މައުމޫނުގެ ވެރިކަމުގައި ދައުލަތަށް ގިނަދުވަހު ޚިދްމަތް ކުރެއްވި ޢިއްޒަތްތެރިއެއްގެ ޝަރަފު އަރުވާފައިވާ ބޭފުޅެކެވެ.
ނިޝާން ޢިއްޒުއްދީންގެ ޢިއްޒަތުގެ ވެރިޔާ، ހ.ބުރެވިމާގޭ މުޙައްމަދު ޒާހިރު އަވަހާރަވުމާގުޅިގެން ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ހިތާމަފާޅުކުރައްވައި އެޢާއިލާއަށް ތައުޒިޔާ ވިދާޅުވެފައެވެ. ރައީސް ޞާލިޙުގެ ތައުޒިޔާގެ މެސެޖުގައިވަނީ މި ހިތާމަވެރި ޚަބަރު އެމަނިކުފާނު އެއްސެވީ ވަރަށް ފުންހިތާމައާ އެކުގައެވެ. އަދި މުޙައްމަދު ޒާހިރަކީ 63 އަހަރަށްވުރެ ދިގު މުއްދަތެއްގައި ދިވެހި ދައުލަތަށް ވަރަށް އިޚްލާޞްތެރި ޚިދުމަތްތަކެއް ކޮށްދެއްވި ބޭފުޅެއްކަން ރައީސް ފާހަގަކުރައްވާފައިވެއެވެ.
"އޭނާއަކީ އެވަގުތަކު ދައުލަތް ހިންގަވަން ހުންނެވި ކޮންމެ ބޭފުޅެއްގެ އަރިހުގައި ތެދުވެރިކަމާއި، ވަފާތެރިކަމާއެކު ޚިދުމަތްކުރެއްވި ނަމޫނާ ޝަޚުސިއްޔަތެކެވެ. ހިތާމައިގެ މި ދަނޑިވަޅުގައި އެ މަނިކުފާނުގެ ޢާއިލާގެ ހުރިހާ ބޭފުޅުންނަށް ދިވެހި ސަރުކާރުގެ ނަމުގައާއި، އަދި އަޅުގަނޑުގެ އަމިއްލަ ނަމުގައި ވަރަށް އިޚްލާޞްތެރި ކަމާއެކު ތައުޒިޔާ ދަންނަވަމެވެ." ރައީސް ޞާލިޙުގެ ތައުޒިޔާގެ މެސެޖުގައިވެއެވެ.
ނިޝާން ޢިއްޒުއްދީންގެ ޢިއްޒަތުގެ ވެރިޔާ، ހ.ބުރެވިމާގޭ މުހައްމަދު ޒާހިރު އަވާހަރަވީއިރު ޢުމުރުފުޅުން 92 އަހަރެވެ. މުޙައްމަދު ޒާހިރު އަވަހާރަވިއިރު އަނބިކަނބަލަކާއި، ހަތް ބޭފުޅުން ދުނިޔޭގައި އެބަ ތިއްބެވިއެވެ. އެއީ ހަތަރު ފިރިހެން ބޭފުޅުންނާއި، ތިން އަންހެން ބޭފުޅުންނެވެ. އަލްމަރްޙޫމް މުޙައްމަދު ޒާހިރުގެ މައްޗަށް ކަށު ނަމާދު ކުރުން އޮންނާނީ މާދަމާ ރޭ ޢިޝާ ނަމާދަށްފަހު އިސްލާމީ މަރުކަޒުގައެވެ.