މުސްތަޤުބަލަށް ބޭނުންވާ ފުޓުބޯޅަ ކުޅުންތެރިން ބިނާ ކުރުމުގެ މަޤުޞަދުގައި ފުޓް ބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރިޔަށްގެންދާ "ގްރާސްރޫޓްސް ކޮމްޕެޓިޝަން 2019" އައްޑޫ ސިޓީގައި ބާއްވައިފިއެވެ.
ބާރަ އަހަރުން ދަށުގެ ކުދިންނަށް ޢަމާޒުކޮށް "ޓުވާރޑްސް ފިއުޗަރގެ" ޝިޢާރުގެ ދަށުން ދެދުވަހުގެ މުއްދަތައް އެފްއޭއެމުން ކުރިޔަށްގެންދާ މި މުބާރާތުގެ މެޗުތައް ކުޅެފައިވަނީ އައްޑޫ ފުޓްބޯޅަ ސްޓޭޑިއަމުގައެވެ.
ޕީއެސްއެމް ނިއުސް އަށް މައުލޫމާތު ދެއްވަމުން އެފްއޭމްގެ ހެޑް އޮފް ގްރާސްރޫޓް އަހްމަދް ޝަރީފް (ޑުންގާ) ވިދާޅުވީ މި މުބާރާތުގައި އައްޑޫސިޓީގެ އަވަށްތަކުން މުޅިއެކު 7 ސްކޫލަކުން ޖުމްލަ 292 ދަރިވަރުން ވަނީ ބައިވެރިވެފައިކަމަށާއި އެފްއޭމުން ޢާންމު ކޮށް މި އުމުރުފުރާތަކަށް ޢަމާޒުކޮށްގެން ގްރާސްރޫޓް މުބާރާތެއް ބޭއްވުމަށް ނިންމީ މިފަދަ މުބާރާތެއް ބޭއްވުމުން ފުޓުބޯޅަ ކުޅެން ފަރިތަވެ، ފުޓްބޯޅައަށް ޝައުގުވެރިވާ ދަރިވަރުންގެ ހުނަރު ތަރައްޤީކުރުމަށް ފުރުޞަތު ފަހިކޮށްދިނުމުގެ ބޭނުމުގައިކަމަށް ކަމަށެވެ.
މީގެ އިތުރުން މި ފެސްޓިވަލްގައި އަމިއްލަޔަށް އިސްނަގައިގެން 16 ކޯޗުންވެސް ވަނީ ބައިވެރިވެފައިކަމަށް ޑުންގާ ވިދާޅުވިއެވެ.
އެފްއޭއެމް ގެ ޢަމާޒަކީ މާލެއާއި އައްޑޫ ސިޓީގެ އިތުރަށް ކުރިޔަށް އޮތް ތާނގައި ރާއްޖޭގެ އެހެން ކަންކޮޅުތަކުގައި ވެސް އެފްއޭއެމްގެ އޮފީސްތައް ހުޅުވައި، މުޅި ރާއްޖެއަށް ޢަމާޒުކޮށްގެން މިފަދަ މުބާރާތްތައް ބޭއްވުން ކަމަށް އެފްއޭއެމުން ބުނެއެވެ. އެފްއޭމް އައްޑޫ ގޮފި އިފްތިތާޙުކުރީ 2000 ވަނަ އަހަރުއެވެ. އެއަހަރުން ފެށިގެން އެފްއޭއެމުންވަނީ އައްޑޫ ސިޓީގައި ވައިޑީޕީ ޕޮރޮގްރާމުތަކުގެ އިތުރުން އިންޓަރ ސްކޫލު މުބާރާތްތަށް އިންތިޒާމު ކޮށް ބާއްވަމުންނެވެ.