އެމްއެމްޕީއާރްސީގެ ބޮޑު ޚިޔާނާތާއި ގުޅިގެން ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު ޢަމަލު ކުރައްވަމުން ގެންދަވާ ގޮތަށް ތާޢީދު ކުރައްވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމްއެމްޕީއާރްސީގެ ޚިޔާނާތާއި ގުޅިގެން އެންޓި ކޮރަޕްޝަން ކޮމިޝަން (އޭސީސީން) ނެރުނު ރިޕޯޓުގައި ޚިޔާނާތުގެ ފައިސާ ޖަމާކޮށްފައިވާ އެސްއޯއެފް އެކައުންޓުން 155 ފަރާތަކަށް ފައިސާ ޖަމާކޮށްފައިވާ ކަމަށް ވަނީ ބުނެފައެވެ. އޭގެތެރޭގައި މި ސަރުކާރުގެ އިސްވެރިންތަކެއްވެސް ހިމެނެއެވެ. އެހެންކަމުން އެބޭފުޅުން ގޭގައި މަޑު ކުރުމަށް ރައީސް އޮފީހުން ވަނީ އަންގާފައެވެ.
ރައީސް ނަޝީދު ކުރައްވާފައިވާ ޓްވީޓެއްގައި މިރޭ ވިދާޅުވީ އެމްއެމްޕީއާރްސީގެ ބޮޑު ޚިޔާނާތާއި ގުޅިގެން ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު ޢަމަލު ކުރައްވަމުން ގެންދަވާ ހިތްވަރު ގަދަ، ހަމަހަމަ ޢުޞޫލަށް ފުރިހަމައަށް ތާޢީދު ކުރައްވާ ކަމަށެވެ. އަދި އެ މައްސަލާގައި ތުހުމަތު ކުރެވޭ ފަރާތްތަކަށް އަވަސް ފިޔަވަޅު އަޅުއްވާނެ ކަމާއި މެދު ޝައްކު ނުކުރައްވާ ކަމަށްވެސް ރައީސް ނަޝީދުގެ ޓްވީޓުގައި ވަނީ ވިދާޅުވެފައެވެ.
އޭސީސީގެ ރިޕޯޓުގައި 57 ރަށެއްގެ މައްސަލަ ބަލާފައިވާ ކަމަށް ވަނީ ބުނެފައެވެ. އެ ރަށްތަކުގެ އެކުއިޒިޝަން ކޮސްޓްގެ ގޮތުގައި ލިބުނު ފައިސާ އެމް.އެމް.ޕީ.އާރ.ސީގެ އެކައުންޓްތަކަށް ޖަމާނުކޮށް ޗެކް އެންޑޯސްކޮށްގެން އެކިއެކި އަމިއްލަ ފަރާތްތަކުގެ އެކައުންޓްތަކަށް ޖަމާކޮށްފައިވާ ކަމަށްވެސް ރިޕޯޓުގައި ބުނެފައިވެއެވެ. އެގޮތުން ރަށްތަކުގެ އެކުއިޒިޝަން ކޮސްޓްގެ ގޮތުގައި ލިބުނު 77.45 މިލިއަން ޑޮލަރު އެމްއެމްޕީއާރްސީއަށް ލިބެންޖެހެއެވެ.