އެފްއޭއެމްގެ މެނޭޖްމަންޓް ބަދަލުކުރުމަށް ކުރަމުންދާ މަސައްކަތް ހުއްޓައެއް ނުލާނަން - ވިކްޓްރީ
އެފްއޭއެމްގެ މެނޭޖްމަންޓް ބަދަލުކުރުމަށްޓަކައި ވިކްޓްރީގެ އިސްނެގުމުގެ ދަށުން ބައިވެރިވި ކްލަބްތަކާއެކު، އެ މަސައްކަތް ހުއްޓާނުލާ ކުރިއަށް ގެންދާވާނެކަމަށް ވިކްޓްރީ ސްޕޯޓްސް ކްލަބްގެ ޗެއަރމަން ނާޝިދު ވިދާޅުވެއްޖެއެވެ.
ނާޝިދު މިހެން ވިދާޅުވީ އެފްއޭއެމްގެ މެނޭޖްމަންޓް ބަދަލްކުރުމަށް ވިކްޓްރީން 15 ކްލަބެއްގެ ސޮޔާއެކު ހުށަހެޅި މައްސަލައިގައި ގާނޫނީ ޝަރުތުތައް ހަމަ ނުވާކަމަށް ބުނެ އެފްއޭއެމުން ނެރުނު ބަޔާނާ ގުޅިގެން ޕީއެސްއެމް ސްޕޯޓްސްއަށް ދިން އިންޓަވިއުއެއްގައެވެ.
އެފްއޭއެމުން ބުނީ ވިކްޓްރީން 19 ކުލަބުން ސޮއިކޮށްފައިވާކަމަށް ބުނެ ފަތުރަމުންދަނީ ދޮގުވާހަކައެއްކަމަށް. އެސޯސިއޭޝަނަށް ނާޝިދު ވިދާޅުވީ، ވިކްޓްރީއާއެކު އެއްބަސްވުން ހަދާފައިވާ އެއްވެސް ކްލަބަކުން ސޮއި އަނބުރާ ގެންދިޔަކަން ކްލަބަށް އަންގާފައި ނުވާ ކަމަށާއި، ގަރާރުގައި އެކުލެވޭ ހުރިހާ ކްލަބެއްވެސް އެކްސްޓްރާ އޯޑިނަރީ ކޮންގްރެސް ބޭއްވުމަށް ވިކްޓްރީއިން ކުރާ މަސައްކަތުގައި އެއްބާރުލުން ދެމުން ދާކަމަށެވެ.
ނިއުރޭޑިއެންޓް، ފޯކައިދޫ އަދި ރޮކް ސްޓްރީޓް ގެ ސޮއި ބަލައި ނުގަތުމަށް އެފްއޭއެމުން ނިންމާފައިވީ ނަމަވެސް އެ ކްލަބްތަކަކީ އެފްއޭއެމުން ބާއްވާ މުބާރާތްތަކުގައި ވާދަކުރާ ކްލަބްތަކެކެވެ. އެކްސްޓްރާ އޯޑިނަރީ ކޮންގްރެސް ބޭއްވުމަށް ކުރާ މަސައްކަތުގައި ކުރިއަށްދާނީ މިހާރުވެސް ގަރާރުގައި ސޮއިކޮށްފައި ތިބި ކްލަބްތަކާވެސް އެކުކަމަށް ނާޝިދު ވިދާޅުވިއެވެ.
އިތުރު ކްލަބްތަކެއްގެ ސޮއި ހޯދަން މަސައްކަތްކުރާނެތޯ އެހުމުން ނާޝިދު ވިދާޅުވީ މިއީ އެފްއޭއެމާއި ޒާތީވެގެން ކުރާ މަސައްކަތެއް ނޫންކަމަށާއި، މިއީ ދިވެހި ފުޓުބޯޅައިގެ ކުރިމަގަށްޓަކައި ކުރާ މަސައްކަތެއް ކަމަށެވެ. އަދި މިކަން ކްލަބްތަކަށް ވިސްނައިދީ، ފުޓުބޯޅައިގެ ފައިދާއަށްޓަކައި ހުރިހާ ކްލަބެއްގެ އެއްބާރުލުން ހޯދަން މަސައްކަތް ކުރާނެ ކަމަށެވެ.
އެފްއޭއެމްގެ މެނޭޖްމަންޓް އެކުލަވާލެވެނީ މެމްބަރުންގެ ވޯޓާއެކުކަން ފާހަގަކުރައްވާ ނާޝިދު ވިދާޅުވީ މެމްބަރުން ހިތްހަމަ ނުޖެހޭނަމަ މެނޭޖްމަންޓް ބަދަލު ކުރުމުގެ ބާރު ލިބެންޖެހޭނެކަމަށެވެ. އެހެންކަމުން މެމްބަރު ކްލަބްތަކަށް ދަތިކުރާނަމަ މެނޭޖްމަންޓް ބަދަލުކުރުމަކީ އެންމެ ރަނގަޅު ގޮތްކަންވެސް ނާޝިދު ވިދާޅުވިއެވެ.
އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް ވިކްޓްރީން ހުށަހެޅުމާއެކު، އެކަމުގެ ލަފަޔަށް އެދި އެފްއޭއެމުން ފީފާގައި އެދުމުން، ފީފާއިން ވަނީ މިހާރު އެކްޓްރާ އޯޑިނަރީ ކޮންގްރެސްއެއް ބޭއްވުމުގެ ބަދަލުގައި، އަންނަ މަހު 25 ވަނަ ދުވަހު އެފްއޭއެމުން ތާވަލުކޮށްފައިވާ އަހަރީ ކޮންގްރެސްގައި މައްސަލަ ހުށަހެޅުމުގެ ފުރުސަތު އޮންނާނެކަމަށް ބުނެފައެވެ.