ގައުމީ ބެޑްމިންޓަން ޓީމްގެ ތެރޭގައި އެއްވެސް ތަފާތުކުރުމެއް ގެންގުޅޭކަން އެސޯސިއޭޝަންގެ މެނޭޖެމަންޓަށް ފާހަގަކުރެވިފައި ނުވާކަމަށާއި، އެފަދަކަމެއް މެނޭޖްމެންޓްގެ ސަމާލުކަމަށް އެއްވެސް ފަރާތަކުންވެސް ގެނެސްފައި ނުވާކަމަށް މޯލްޑިވްސް ބެޑްމިންޓަން އެސޯސިއޭޝަނުން ބުނެފިއެވެ.
ބެޑްމިންޓަން އެސޯސިއޭޝަނުން މިހެން ބުނީ ޓީމްގެ އަންހެން މެނޭޖަރކަމުގެ މަގާމުގައި ހުރި ނީޒާ ޝަރީފް މަގާމުން އިސްތިއުފާ ދިނުމަށްފަހު ނެރުނު ބަޔާނާ ގުޅިގެންނެވެ. ނިމިދިޔަ ހަފްތާގައި މަގާމުން އިސްތިއުފާ ދިނުމަށްފަހު، ނެރުނު ބަޔާނުގައި ނީޒާ ވަނީ އެސޯސިއޭޝަނުން ބޭއިންސާފުން ކަންތައްތައް ކުރާކަމަށް ބުނެފައެވެ. އެގޮތުން އެސޯސިއޭޝަނުން ކަންކުރަނީ ކުޅުންތެރިންނަށް ފައިދާވާގޮތަށް ނޫންކަމަށާއި، ޤަވާއިދުތައް ތަންފީޒު ކުރުމުގައި ކުޅުންތެރިންގެ މެދުގައި ތަފާތުކުރުން ގެންގުޅޭކަން ނީޒާ ވަނީ ބަޔާނުގައި ފާހަގަކޮށްފައެވެ. މި ބަޔާނުގެ މަގުސަދަކީ މިފަދަކަންކަން ބެޑްމިންޓަނަށް ހެޔޮއެދޭ ފަރާތްތަކުގެ ސަމާލުކަމަށް ގެނައުންކަމަށްވެސް ނީޒާ ބުނެފައިވެއެވެ.
ބަޔާނާ ގުޅިގެން ޕީއެސްއެމް ސްޕޯޓްސްއާއި ވާހަކަދައްކަމުން ނީޒާ ބުނީ، އިސްތިއުފާ ދިނީ އެސޯސިއޭޝަން ތެރޭގައި ބޭއިންސާފުން ހިނގާ ކަންތައްތައް ރަނގަޅުކުރުމަށް މަސައްކަތްކޮށް، އެކަންތައް ހައްލު ނުވުމުންކަމަށެވެ. ނީޒާ ބުނީ މީގެ ކުރިންވެސް އެސޯސިއޭޝަން ކަންތައް ކުރަމުންދާ ގޮތާމެދު ހިތްހަމަނުޖެހުން ފާޅުކޮށްފައިވާނެކަމަށެވެ. އަދި އެކި ލެވެލްތަކުގެ މީޓިން ތަކުގައި މިކަންތައް ފާހަގަކޮށްފައިވާނެ ކަމަށާއި ނަމަވެސް ކަންތައް ޙައްލުކުރުމަށް އެއްވެސް ކަހަލަ އެއްބާރުލުމެއް އެސޯސިއޭޝަންގެ ފަރާތުން ލިބިފައި ނުވާކަމަށެވެ.
ނީޒާ ބުނީ އޭނާގެ ބެލުމުގެ ދަށުގައި ގައުމީ ޓީމްގެ އަންހެން ކުޅުންތެރިން ރާއްޖެއިން ބޭރުގައި އަޚުލާގީ މައްސަލަތަކެއް ދިމާވިކަމަށްދެކެވޭ ވާހަކަތަކަކީ ކުޅުންތެރިންގެ ނަން ކިލަނބުކުރުމުގެ ނިޔަތުގައި ދެކެވޭ ހަގީގަތެއްނެތް ވާހަކަތަކެއް ކަމަށެވެ.
މިކަމާ ގުޅިގެން ބެޑްމިންޓަން އެސޯސިއޭޝަނުން ބުނީ ނީޒާ އިސްތިއުފާ ދިން ސިޓީގައިވެސް އަދި އެހެންގޮތަކުންވެސް، ޓީމްތެރޭގައި އެއްވެސް މައްސަލައެއް އުޅޭކަމުގެ މައުލޫމާތު ހިއްސާ ކޮށްފައި ނުވާކަމަށެވެ. މީގެ އެއް ހަފްތާކުރިން ބޭއްވި ބައްދަލުވުމުގައިވެސް އެފަދަވާހަކައެއް ދައްކާފައިވެސް ނުވާކަމަށެވެ.
އޭގެ އިތުރުން، ނީޒާއާއެކު މަސައްކަތްކުރާ ފިރިހެން މެނޭޖަރގެ އިތުރުން ސީނިއަރ ކުޅުންތެރިންވެސް، ޓީމްތެރޭގައި އެއްވެސް ތަފާތުކުރުމެއް ގެންގުޅޭކަމަށް ބުނެފައިނުވާކަމަށްވެސް އެސޯސިއޭޝަނުން ބުންޏެވެ.
އެސޯސިއޭޝަނުން ބުނީ، މެނޭޖަރެއްގެ ހައިސިއްޔަތުން ލިބެންޖެހޭ ހުރިހާ ބާރެއް ނީޒާއަށް ދެވިފައިވާނެ ކަމަށާއި، މެނޭޖްމެންޓުން އެއްވެސް އިރެއްގައި މެނޭޖަރގެ ނިންމުންތަކާއި ނުވަތަ ހިޔާލުތަކާއި ދެކޮޅުހަދާފައި ނުވާނެކަމަށެވެ. އަދި މެނޭޖަރެއްގެ ހައިސިއްޔަތުން ކުޅުންތެރިންގެ މެދުގައި ތަފާތުކުރުމެއް ފާހަގަވާނަމަ އެކަން ހައްލުކުރުމުގެ ބާރުވެސް ލިބިދީފައިވާނެކަމަށެވެ.
ކުޅުންތެރިންގެ ޑިސިޕްލިނަރީ ކަންތައްތައް ބަލާނީ އެކަމަށް ހާއްސަ ކޮމިޓީއަކުން ކަމަށާއި، އެސޯސިއޭޝަން ތެރޭގައި ކުޅުންތެރިންގެ ނަން ކިލަނބުވާފަދަ ވާހަކަތައް ދެކެވޭކަމުގެ މައުލޫމާތު ލިބިފައި ނުވާކަންވެސް އެސޯސިއޭޝަނުން ފާހަގަކުރިއެވެ.
އަދި ނީޒާ ބަޔާނުގައި ހުރި ކަންތައްތަކަކީ މުޅިން އަލަށް އެސޯސިއޭޝަންގެ މެނޭޖެމަންޓްގެ ސަމާލުކަމަށް އައި ކަންތައްތަކަށް ވުމާއެކު، އެކަންތައްތައް އެސޯސިއޭޝަނަށް މުޅިން ސާފު ނުވާތީ، އެސޯސިއޭޝަން އިތުރަށް ހަރުދަނާ ކުރުމަށް ނީޒާ ބަޔާންގައި ބުނެފައިވާ ކަންތަށްތަށް އެސޯސިއޭޝަންގެ އެގްޒެކެޓިވް ލެވެލްގައި އިތުރަށް ދިރާސާ ކުރާނެކަމަށެއެވެ. އަދި މެނޭޖަރަކަށް ހުރިއިރު މިފަދަ ކަންތަށްތަށް އެސޯސިއޭޝަންއާއެކު ހިސްނާކޮށްފައިނުވާތީ އެކަންތަށްތަށްވެސް ބެލުމަށް ހަމަޖެހިފައިވާކަމަށް ބެޑްމިންޓަން އެސޯސިއޭޝަނުން ވަނީ ބުނެފައެވެ.
ބެޑްމިންޓަން އެސޯސިއޭޝަންގެ ގައުމީ ޓީމްގެ ކުޅުންތެރިންގެ މެދުގައި ތަފާތުކުރުން ގެންގުޅޭކަމަށް ބުނެ ހާޒިރީއަށް ބަދަލުގެނައި މައްސަލައިގައި ކުޅަދާނަ ބެޑްމިންޓަން ކުޅުންތެރިޔާ ފާތިމަތު ނަބީހާ ވަނީ ފާއިތުވި ހަފްތާގައި ސަސްޕެންޑްވެސް ކޮށްފައެވެ، ނަމަވެސް ފަހުން ނަބީހާ ކުރި ކަންތަކުގެ ޒިންމާ ނަގާ މާފަށް އެދުމުން އެސޯސިއޭޝަނުން ވަނީ ސަސްޕެންޝަން ބާތިލުކޮށް، ގައުމީ ޓީމްގެ ފަރިތަކުރުންތަކުގައި ބައިވެރިވުމަށް ހުއްދަ ދީފައެވެ.