ކުރިއަށް އޮތް ދެ ސީޒަންގައިވެސް ބާސެލޯނާގެ ކޯޗެއްގެ ގޮތުގައި މަޑުކުރަން އާނެސްޓޯ ވަލްވާޑޭ ނިންމައިފިއެވެ.
2017ވަނަ އަހަރު އެކުލަބުގެ ކޯޗުކަމާއި ހަވާލްވި ވަލްވާޑޭވަނީ އޭނާގެ ފުރަތަމަ ސީޒަންގައި ބާސެލޯނާއަށް ލަލީގާ އަދި ކޮޕަޑެލްރޭ ތަށި ހޯދައިދީފައެވެ.
55 އަހަރުގެ ކޯޗު ބާސެލޯނާއާއިއެކު ފުރަތަމަ ކޮންޓްރެކްޓް ހެދީ މި ސީޒަންގައި ނިޔަލަށެވެ. އިތުރު ދެ އަހަރު ކުލަބުގައި މަޑުކުރަން ނިންމުމަށްފަހު ވަލްވާޑޭ ބުނީ މިއީ ކުލަބުންވެސް ބޭނުންވާ ގޮތްކަމާށާއި، ބާސެލޯނާއާއިއެކު އިތުރު ކާމިޔާބީތައް ހޯދަން ބޭނުންވާކަމަށެވެ.
މިހަތަނަށް ބާސެލޯނާއަށް ވަލްވާޑޭ އިރުޝާދުދިން 96 މެޗުގެ ތެރެއިން އެޓީމްވަނީ 65 މެޗުން މޮޅުވެފައެވެ. 22 މެޗު އެއްވަރުވިއިރު ބަލިވީ އެންމެ 9 މެޗުންނެވެ.
ޗެމްޕިއަން ބާސެލޯނާއަށް ލީގުގައި ކުރިއަށް އޮތީ ރެއާލް ވަލޮޑޮލިޑާއި ވާދަކުރާ މެޗެވެ. މި ސީޒަން ލީގުގައި ބާކީ ފަނަރަ މެޗު އޮތްއިރު 51 ޕޮއިންޓާއިއެކު ބާސެލޯނާ އޮތީ ލީގް ތާވަލްގެ އެއްވަނައިގައެވެ.