ޔުނައިޓެޑް އަރަބި އެމިރޭޓްސްގެ ނާއިބު ރައީސް، ޝެއިޚް މުޙައްމަދު ބިން ރާޝިދް އަލް މަޚްތޫމްގެ ޙާއްސަ ދަޢުވަތަކަށް ކުރަށްވާ ރަސްމީ ދަތުރުފުޅެއްގައި މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދުދީދީ އެ ޤައުމަށް ފުރާވަޑައިގެންފިއެވެ.
މިނިސްޓަރގެ މިދަތުރުފުޅުގައި، ދިވެހި ރާއްޖޭގެ ދިފާޢީ ދާއިރާ ހަރުދަނާކޮށް، ކުރިއެރުވުމަށް ކުރާ މަސައްކަތުގައި، ޔޫއޭއީގެ ފަރާތުން ދިވެހި ރާއްޖެއަށް އެހީތެރިކަން ފޯރުކޮށްދެއްވިދާނެ ގޮތްތަކާއި ދާއިރާތައް ބެއްލެވުމަށްޓަކައި މިނިސްޓަރ މާރިޔާ ބައެއް ބޭފުޅުންނާއި ބައްދަލުކުރެއްވުމަށް ހަމަޖެހިފައިވެއެވެ.
މިނިސްޓަރ މާރިޔާގެ ދަތުރުފުޅުގައި މިމަހުގެ 16 އިން 21 އަށް އަބޫދާބީގައި ބޭއްވުމަށް ހަމަޖެހިފައިވާ، އިންޓަނޭޝަނަލް ޑިފެންސް އެގްޒިބިޝަން އެންޑް ކޮންފަރެންސާއި، މިމަހުގެ 16 ވަނަ ދުވަހު ކުރިޔަށް ގެންދިއުމަށް ހަމަޖެހިފައިވާ އިންޓަނޭޝަނަލް ޑިފެންސް ކޮންފަރެންސްގައި ބައިވެރިވެވަަޑައިގަތުމަށް ވެސް ވަނީ ހަމަޖެހިފައެވެ.
މިމަހުގެ 16 ވަނަ ދުވަހު ބާއްވާ އިންޓަނޭޝަނަލް ޑިފެންސް ކޮންފަރެންސަކީ 32 ޤައުމެއްގެ، އެކި ދާއިރާތަކުގެ އެންމެ އިސް ބޭފުޅުން ބައިވެރިވެވަޑައިގަންނަވާ ކޮންފަރެންސެކެވެ. އަދި 16 އިން 21 އަށް ކުރިއަށްދާ އިންޓަރނޭޝަނަލް ޑިފެންސް އެގްޒިބިޝަން އެންޑް ކޮންފަރެންސްގައި، ދިފާޢީ ދާއިރާތައް ހަރުދަނާކުރުމަށް ކުރެވޭ މަސައްކަތުގައި ބޭނުންކުރެވޭ އެންމެ ފަހުގެ ވަޞީލަތްތަކާއި އާލާތްތައް ދައްކާލުމަށް ހަމަޖެހިފައިވެއެވެ.
ޑިފެންސް މިނިސްޓްރީން ބުނީ މިކޮންފަރެންސާއި އެގްޒިބިޝަންގެ ސަބަބުން އެހެން ޤައުމުތަކުގެ އަސްކަރިއްޔާތަކާއި، ދިފާޢީ ދާއިރާތަކުގެ އިސް ބޭފުޅުންނާއި ބައްދަލުވެ، ޚިޔާލުބަދަލުކުރެވި މަޝްވަރާކުރުމަށް ފުރުޞަތު ފަހިވެގެންދާނެ ކަމަށެވެ.
ޑިފެންސް މިނިސްޓަރ މާރިޔާ ޔޫއޭއީއަށް ވަޑައިގެންފައިވާއިރު ދާދިފަހުން އެކަމަނާ ވަނީ އަވަށްޓެރި އިންޑިއާއަށްވެސް ވަޑައިގެންފައެވެ.