ޕީޕީއެމްއާއި ޕީއެންސީ ކޯލިޝަނުން ރައީސް ޔާމީންގެ ތާއިދާއެކު މަޖިލިސް އިންތިޚާބަށް ނެރެން ތައްޔާރުކުރި ކެނޑިޑޭޓުންގެ އަތުން ޓިކެޓް އަތުލައި އެދާއިރާތަކަށް ވާދަކުރާ ޖުމްހޫރީ ޕާޓީގެ ކެނޑިޑޭޓުންނަށް ތާއީދުކުރުމަށް ޔާމީން ނިންމަވައިފިއެވެ.
އެނގިފައިވާ ގޮތުގައި ޓިކެޓް ދިން ބައެއް މެމްބަރުންނަށް އެދާއިރާތަކުން ނަންނެގުމަށް ވަނީ އަންގާފައެވެ. އަދި ކެމްޕެއިން ހަރަކާތްތައްވެސް ހުއްޓާލުމަށް ވަނީ އަންގާފައެވެ. ޓިކެޓް އަތުލައި ނަން ނެގުމަށް އެންގި ދާއިރާތަކުގެ ތެރޭގައި ގެމަނަފުށީ ދާއިރާއާއި މަތިވެރި ދާއިރާވެސް ހިމެނެއެވެ.
އަންނަ އޭޕްރީލް މަހު ބާއްވާ ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް ޖޭޕީން ވަނީ ރައީސް ޔާމީނާ މަޝްވަރާކޮށްފައެވެ. އެގޮތުން ޖޭޕީން ވާދަކުރާ 25 ދާއިރާއަކަށް ވާދަނުކުރުމަށް ޕީޕީއެމް ޕީއެންސީ ކޯލިޝަނުން ނިންމާފައިވާކަން އެނގިފައިވެއެވެ.
ޖުމްހޫރީ ޕާޓީގެ ލީޑަރ ޤާސިމް އިބްރާހިމް ޕީޕީއެމްއާޢި މަޝްވަރާކޮށްފައިވަނީ އަންނަ މަޖިލިސް އިންތިޚާބުގައި މަޖިލީހުގެ ހުރިހާ ދައިރާއަކަށް އެމްޑީޕީން ވާދަކުރުމަށް ނިންމުމުންނެވެ. އަދި އެގޮތަށް ނިންމާފައިވާތީ ޤާސިމްވަނީ އެމްޑީޕީއަށާއި އެޕާޓީގެ ރައީސް ނަޝީދަށްވެސް ބަހުގެ ހަމަލާތަކެއް ދެއްވާފައެވެ.