ފުޓްބޯޅައާއި ނެޓްބޯޅަ ހިމެނޭގޮތަށް ލަންދޫ ޔޫޓޫޖޭ އެކަޑަމީގެ ފުރަތަމަ ފިއެސްޓާ ފަށައިފިއެވެ.
ލަންދޫގައި މިހާތަނަށް އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ޔޫސުފް އަބުދުއްރަހީމާއި، ހުސެއިން ޖަވާދުގެ އެކަޑަމީން ކުރިއަށްގެންދާ ފުރަތަމަ ' ޔޫޓޫޖޭ ފިއެސްޓާ " ގައި 190 ދަރިވަރުން ވާދަކުރެއެވެ. އެކަޑަމީ ފެށުމުގައި ރަށުގެ މުއްސައްޞާތަކުގެ އިސްވެރިން ހިމެނޭ ޝަރަފުވެރިންގެ ޓީމަކުން ބައިވެރިވިއެވެ.
ފިއެސްޓާގައި ވާދަކުރާ އަންހެން އަދި ފިރިހެން ދަރިވަރުން ބަހާލާފައިވަނީ ތިން ކެޓަގަރީއަކަށެވެ. އެއީ ލެވެލް 1،2 އަދި 3. ފިއެސްޓާ ކުރިއަށްގެންދަނީ އެކަޑަމީގެ ފަރާތުން ކުދިންނަށް ޖަރޒީއާއި، ބޯޅަ އަދި އިންޓަރވަލްވެސް ފޯރުކޮށްދީގެންނެވެ. އެކަންކަން ފުރިހަމަކުރުމަށް ހެޕީމާކެޓާއި، ނިއުވިއުއާއި، ދިރާގާއި، ލަންދޫ ކުޑާ މާޓާއި، ހިތްވަރު ކާޕެންޓްރީ އަދި ލަންދޫ ތަރުތީލުލް ޤުރުއާން އިންސްޓިޓިއުޓުން ވަނީ ސްޕޮންސަރގެ އެހީތެރިކަން ދީފައެވެ.
މުބާރާތުގައި ވާދަކުރާ ކުޅުންތެރިންނާއި ވަނަތައް ހޯދާ ޓީމްތަކަށް ތަށްޓާއެކު މެޑަލް ދިނުމަށް ހަމަޖެހިފައިވާ މި ފިއެސްޓާ ހަފްތާއެއްގެ މުއްދަތަށް ކުރިއަށްދާނެކަމަށް ޔޫޓޫޖޭ އެކަޑަމީން މައުލޫމާތުދެއެވެ. މިއީ ލަންދޫގައި ފުރަތަމަ ރަޖިސްޓްރީ ކުރެވުނު އެކަޑަމީއެވެ.
އެކަޑަމީ ރަޖިސްޓްރީ ކުރީ މިދިޔަ އަހަރުގެ ޖެނުއަރީ މަހުގައެވެ. ފިއެސްޓާއަށް ބެލެނިވެރިންގެ ވަރަށްބޮޑު ތަރުހީބެއް ދަނީ ލިބެމުންނެވެ.