އިނގިރޭސި ކްލަބް އާސެނަލްގެ މިޑްފިލްޑާ އާޔަން ރަމްސޭ، އިޓަލީގެ ޗެމްޕިއަން ޔުވެންޓާސް އަށް ބަދަލުވާން އެއްބަސްވެއްޖެއެވެ.
ރަމްސޭ ޔުވެންޓަސްއަށް ބަދަލުވާން ނިންމާފައިވަނީ ހަތަރު އަހަރުގެ އެއްބަސްވުމެއްގެ ދަށުން ހަފްތާއެއްގެ މައްޗަށް ހަތަރު ލައްކަ ޕައުންޑުގެ އަގަކަށެވެ. މި އެއްބަސްވުމުގެ ދަށުން އޭނާ ވެގެންދާނީ އިނގިރޭސިވިލާތުން އެންމެ ބޮޑު މުސާރާއެއް ލިބޭނެ ކުޅުންތެރިޔާއަށެވެ.
މިފަހަރުގެ ފިނިމޫސުމުގެ ޓްރާންސްފާގައި ސްޕެއިންގެ ބާސެލޯނާއަށާއި، ފްރާންސްގެ ޕީއެސްޖީ އާއިއެކުވެސް ރަމްސޭ ވަނީ މަޝްވަރާ ކޮށްފައެވެ.
އެގާރަ އަހަރަށްފަހު ރަމްސޭ އާސެނަލް ދޫކޮސްލާފައި މިވަނީ އެކުލަބުގެ މިހާރުގެ ކޯޗް އުނާއި އެމެރީގެ އިރުޝާދުގެ ދަށުން ރަމްސޭއަށް އެކަށީގެންވާ ވަރަށް ފުރުސަތު ނުލިބޭކަމަށް އަޑު ފެތުރިފައިވާ ދަނޑިވަޅެއްގައެވެ.
ޔުވެންޓަސްއައިއެކު ރަމްސޭ ހަދާފައިވާ އެއްބަސްވުމުގެ ދަށުން އެނާ އެކުލަބަށް ބަދަލުވާނީ މިސީޒަނަށްފަހުއެވެ. އާސެނަލް އާއިއެކު ރަމްސޭ ހަދާފައިވާ އެއްބަސްވުން އަންނަ ޖޫން މަހު ހަމަވާނެއެވެ. އެހެންކަމުން ޔުވެންޓަސްއަށް ޓަރާންސްފާ ފީއެއްގެ ގޮތުގައި އެއްވެސް އަގެއް ދައްކާކަށް ނުޖެހޭނެއެވެ.