މެންޗެސްޓާ ޔުނައިޓެޑުގެ ކުރީގެ ތަރި ޕައުލް ސްކޯލްސް އިނގިރޭސި ހަތަރުވަނަ ޑިވިޝަންގެ ކްލަބް އޮލްޑަމް އެތްލެޓިކްގެ ކޯޗުކަމާއި ހަވާލުވެއްޖެއެވެ.
ސްކޯލްސް އެޓިމުގެ ކޯޗުކަމާއި ހަވާލުވެފައިވަނީ އަށާރަ މަސްދުވަހުގެ އެއްބަސްވުމެއްގެ ދަށުންނެވެ. އޭނާ މިމަގާމާއި ހަވާލުވެފައި މިވަނީ ސަލްފޯޑް ސިޓީގެ ޑިރެކްޓާ ކަމުގެ މަގާމުން އިސްތިއުފާ ދިނުމަށްފަހުއެވެ.
ސްކޯލްސްގެ އިރުޝާދުގެ ދަށުން އޮލްޑަމް ކުޅޭ ފުރަތަމަ މެޗުގައި މާދަމާ ޔެއޯވިލް ޓައުން އާއި ދެކޮޅަށް ނިކުންނައިރު، މެޗުގެ ކުރިން ނޫސްވެރިންނާއި ވާހަކަ ދައްކަމުން ސްކޯލްސް ބުނީ، އޭނާ މީގެ ކުރިންވެސް ވަރަށް ގާތުން އޮލްޑަމްގެ ހާލަތު ބަލަމުން ދިޔަ ކަމަށާއި، އެކުލަބުގައި ހުނަރުވެރި މޮޅު ކުޅުންތެރިން އެބަތިބި ކަމަށެވެ. އަދި ޓީމު މިވަގުތު އޮތީ ހައްގު މަގާމުގައި ނޫން ކަމަށާއި، މެޗުތައް ކާމިޔާބުކޮށް އިތުރަށް ކުރިއަށްދާން ކުރެވެންހުރި ހުރިހާކަމެއް ކުރާނެ ކަމަށެވެ. މިސީޒަނުގައި އެންމެ ރަނގަޅު ނަތީޖާ ނުނެރެވުނު ނަމަވެސް އަންނަ ސީޒަނުގައި ތަފާތު ދައްކާނެކަމަށްވެސް ސްކޯލްސް ބުންޏެވެ.
ސްކޯލްސްބުނީ، އޭނާ އޮލްޑަމްގެ ކޯޗުކަމާއި ހަވާލުވުމުން، ޔުނައިޓެޑުގައި އޭނާ އާއިއެކު ކުޅުނު ގިނަ ތަރިން އޭނާއަށް ކާމިޔާބީއަށް އެދިފައިވާ ކަމަށާއި، އޭގެ ސަބަބުން މާގާމުގެ ޒިންމާ ފުރިހަމައަށް އަދާކުރަން ވަރަށް ބޮޑު ހިތްވަރެއް ލިބިއްޖެ ކަމަށެވެ.
ޔުނައިޓެޑާއި އިނގިރޭސި ގައުމީ ޓީމުގައިވެސް މީގެކުރިން މުހިންމު ދައުރެއް އަދާކުރި ސްކޯލްސް ވަނީ ކުޅުންތެރިއެއްގެ ގޮތުގައި 11 ފަހަރު އިނގިރޭސި ޕްރެމިއާ ލީގު އަދި ދެފަހަރު އިނގިރޭސި އެފްއޭކަޕް ކާމިޔާބުކޮށްފައެވެ.