ރާއްޖޭގެ ޝަރުޢީ ދާއިރާ އިސްލާޙްކުރުމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ވެރިކަމުގައި މަސައްކަތްކުރެއްވީ އެންމެ ރަނގަޅަށް ނޫންކަމަށާ، އެމަސައްކަތް ކުރެއްވި ގޮތަށް ތާޢީދުނުކުރައްވާކަމަށް ޑީ.އާރު.ޕީގެ ވަގުތީ ލީޑަރު މުޙައްމަދު ނަޝީދު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ބަޔާނާއި ގުޅޭގޮތުން ޕީ.އެސް.އެމުން ގެނެސްދިން ޚާއްސަ ލައިވްކަވަރޭޖަގައި ވާހަކަފުޅުދައްކަވަމުން ނަޝީދު ވިދާޅުވީ ޝަރުޢީ ދާއިރާ އިސްލާޙްކުރުމަށް ވޭތުވެދިޔަ ސަރުކާރުތަކުންވެސް މަސައްކަތްތަކެއް ކުރައްވާފައިވާކަމަށެވެ. އަދި ރައީސް ސާލިޙްގެ ސަރުކާރުން މިކަމަށްޓަކައި މަސައްކަތްކަތްކުރައްވާ މަސައްކަތަކީ ރަނގަޅުކަމެއްކަމަށެވެ. އެހެންނަމަވެސް އެމަސައްކަތް ކުރައްވާނެ ގޮތުގެ މާބޮޑު ތަފްސީލެއް އަދި އެނގިވަޑައި ނުގަންނަވާތީ އެކަމާމެދު ވަކި އެއްޗެއް ވިދާޅުވާން އަދި ނޭނގޭކަމަށްވެސް ނަޝީދު ވިދާޅުވިއެވެ.
ކުރީގެ ރައީސް ނަޝީދުއާއި ކުރީގެ ރައީސް ޔާމީންގެ ވެރިކަމުގައިވެސް ޝަރުއީ ދާއިރާ އިސްލާހުރުމުގެ މަސައްކަތްކުރެއްވި ކަމަށާ، އެހެންނަމަވެސް އެ ދެބޭފުޅުން އެކަމަށްޓަކައި މަސައްކަތްކުރެއްވި ގޮތް ރަނގަޅުކަމަށް ޤަބޫލުނުކުރައްވާކަމަށް އޭނާ ވިދާޅުވިއެވެ.
ނަޝީދުގެ ވެރިކަމުގައި ކްރިމިނަލް ކޯޓުގެ ޤާޒީ ޢަބްދުﷲ މުޙައްމަދު ހައްޔަރުކުރެއްވި ގޮތަށް ފާޑު ވިދާޅުވަމުން ނަޝީދު ވިދާޅުވީ ރައިސް ޔާމީންގެ ވެރިކަމުގައި ފަނޑިޔާރުން ހައްޔަރުކުރިއިރު އިޖުރާޢަތްތައް ފުރިހަމަ ކުރެއްވިކަމަށް ޤަބޫލުކުރައްވާކަމަށާ، އެހެންނަމަވެސް ފަނޑިޔާރުން ހައްޔަރުކުރެއްވީ އެންމެ ރަނގަޅަކަމަށް ދެންނެވެން ނެތްކަމަށެވެ.
"އަބްދުﷲ ޤާޟީ އެކަހެރިކުރަން ބޭނުންވިނަމަ އެކަހެރިކުރެވޭނެ ނިޒާމްއެބައޮތޭ އެގޮތަށޭ އެކަންކުރަންވާނީ ޖުޑީޝަލް އެޑްމިނިސްޓްރޭޝަންގެ ތެރެއިންނޭ، ޖޭ.އެސް.ސީގެ ތެރެއިންނޭ. ފަނޑިޔާރެއް ހައްޔަރުކުރުމަށް ފުރިހަމަކުރަންޖެހޭ އިޖްރާއަތްތަކުގެ ތެރެއިންނޭ. އެގޮތަށޭ އިނގޭތޯ އަބްދުﷲ ސަޢީދު ހައްޔަރުކުރެވުނީ އެގޮތަށް އަލީ ހަމީދު ހައްޔަރުކުރެވިފައިހުރީ އެދެބޭފުޅުން ހަޔަރުކުރެވިފައި ހުރީ އެންމެ ރަނގަޅަކަށޭ، ނޫނީ އެބޭފުޅުންނާމެދު ކުރެވުނު ތުހުމަތުތަކަކީ އެންމެ ރަނގަޅު ތުހްމަތުތަކެކޭ ނޫން އަޅުގަނޑު މިދަންނަވަނީ. އެހެން ނަމަވެސް އިޖްރާޢަތްތައް ފުރިހަމަކުރި. އެއިޖްރާއަތްތައް ފުރިހަމަ ނުކުރުމޭ މީގެ މައްސަލައަކީ" ނަޝީދު ވިދާޅުވިއެވެ.
ރައީސުލްޖުމްހޫރިއްޔާގެ ބެއްލެވުމުގެ ދަށުންނަމަވެސް ޝަރުއީ ދާއިރާގައި ހުރި މައްސަލަތައް ހައްލުކުރަންޖެހޭނީ ކަމާގުޅޭ ޤާނޫނުތަކުން އެބާރުތައް ދީފައިވާ އިދާރާތަކާއި ކޮމިޝަންތަކުގެ ތެރެއިންކަން ފާހަގަކުރައްވަމުން ނަޝީދު ވިދާޅުވީ، ރައީސް ޞާލިޙްގެ ސަރުކާރުންވެސް ޖުޑިޝަރީ އިސްލާޙްކުރުމަކީ ކުރަންޖެހޭ މުހިއްމުކަމެއްކަމަށާ، ނަމަވެސް އެކަންކުރުމުގައި ރަނގަޅު އުސޫލުތަކެއް ގެންގުޅުއްވަންވަން ޖެހޭނެކަމަށެވެ.
" ރައީސް ނަޝީދުވިޔަސް ރައީސް ޔާމީނުވިއަސް ދެބޭފުޅުންވެސް ކުރައްވަން އުޅުއްވީ ވަރަށް ރަނގަޅުކަމެކޭ. ޖުޑިޝަރީ އިސްލާޙްކުރުމުގެ މަސައްކަތް. އެމަސައްކަތް ނުކުރެއްވޭނެ އެހާ ލުއިލުއިކޮށްނެއް އިންގޭތޯ. ރައީސް ނަޝީދުކުރައްވަން އުޅުނު މަސައްކަތައްވެސް އަޅުގަނޑު ތާއީދުކުރަން، ގެންގުޅުއްވި އެޕްރޯޗަށް އަޅުގަނޑު ތާއީދު ނުކުރިއަސް. ރައީސް ޔާމީން ކުރައްވަން އުޅުނު މަސައްކަތައްވެސް އަޅުގަނޑު ތާއީދުކުރަން. މުޅިން ކަމު ނުދިއަސް. މިއަދު ރައީސް އިބްރާހިމް މުޙައްމަދު ޞާލިޙް އެވިދާޅުވާ ކަންތައްތަކަށްވެސް އަޅުގަނޑު ތާއީދުކުރަން ގެންގުޅުއްވާނެ އެޕްރޯޗެއް އަދި އަޅުގަނޑުމެންނަކަށް ނޭނގެ. ޖުޑިޝަރީގައި ހުރީ ކުދި ކުދި މައްސަލަތަކެއް އެކަންކަން ހައްލުކުރެވޭނީ ،ޒާތީ ނުވެ، އެންމެ ގުޅިގެން" ނަޝީދު ވިދާޅުވިއެވެ.
ކޯޓުތަކާއި ފަނޑިޔާރުން އިޞްލާޙުގެ މަގަށް ރުޖޫޢަވެގެން ނޫނީ، ޤައުމުގެ އެއްވެސް ކަމަކަށް ހަމަޖެހުމެއް ނާންނާނެ ކަމަށް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު މިއަދު ދެއްވި ރިޔާސީ ބަޔާނުގައި ވަނީ ވިދާޅުވެފައެވެ. އަދި ޝަރުޢީ ދާއިރާ އިސްލާޙްކުރުމަށް އަލަށް އިންތިޚާބުވާ ރައްޔިތުންގެ މަޖިލީހުގައި ސަރުކާރު ހިންގާ އެމް.ޑީ.ޕީން ކުރާނެ މަސައްކަތްތަކާއި އެކަމުގެ އުސޫލުތައް މިހާރުވަނީ ހާމަކުރަންފަށާފައެވެ.
މީގެ އިތުރުން މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙްޤީގުކުރާ ކޮމިޝަނުގެ ރައީސް ޙުސްނުއް ސުޢޫދު ފަނޑިޔާރުންނާއި ގުޅޭގޮތުން ހާމަކުރެއްވި ވާހަކަތަކާއި ގުޅިގެން އެކަންކަން ބެލުމުގެ މަސައްކަތް ޖުޑީޝަލް ސަރވިސް ކޮމިޝަނުން ވަނީ ފަށްޓަވާފައެވެ. އެގޮތުން ގޭންގުތަކާއި ފަނޑިޔާރުންނާދެމެދު ގުޅުން އޮންނަ ކަމަށް ތުހުމަތު ކުރެވޭ މައްސަލަތަކުގެ ހަޤީގަތް ހޯދުމަށް ޖުޑީޝަލްސާވިސް ކޮމިޝަނުން އެކުލަވާލި ކޮމިޓީގެ ރައީސަކަށް ރައީސް ޞާލިޙްގެ ސަރުކާރުގެ ބަންޑާރަ ނައިބް އިބްރާހިމް ރިއްފަތު އައްޔަން ކުރައްވައި އެކޮމެޓީގެ މަސައްކަތްމިހާރުވަނީ ފަށްޓަވާފައެވެ.