ފާޑުކިއުމާއި އެއްވަރަށް ކުރާ ރަނގަޅު ކަންތައްތައްވެސް ނޫސްވެރިންގެ ފާހަގަކުރަންޖެހޭ - ފިނޭންސް މިނިސްޓަރު
ސަރުކާރުން ކުރާ ކަންކަމަށް ފާޑުކިއުމާއި އެއްވަރަށް ސަރުކާރުން ކުރާ ރަނގަޅު ކަންތައްތަކަށްވެސް ނޫސްވެރިންގެ ސަމާލުކަން ބޭނުންވާކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ފިނޭންސް މިނިސްޓްރީ އަދި ސީ.އެމް.ޑީ.އޭ ގުޅިގެން ނޫސްވެރިންނަށް އަމާޒްކޮށްގެން މިއަދު ކުރިއަށް ގެންދިޔަ ތަމްރީން ޕްރޮގްރާމް ނިމުމުގެ ރަސްމިއްޔާތުގައި ވާހަކަދައްކަވަމުން ފިނޭންސް މިނިސްޓަރު ވިދާޅުވީ، ސަރުކާރަށް ފާޑު ކިޔުމާއި އެއްވަރަށް ސަރުކާރުން ކުރާ ރަގަޅު ކަންތައްތަކާއި ގުޅޭ ޚަބަރުތަކާއި ރިޕޯޓްތައްވެސް ނޫސްވެރިން ގެނެސްދޭން ޖެހޭ ކަމަށެވެ.
ބައެއް ފަހަރު، ޚަބަރުތަކުގައި މައުލޫމާތު ފުރިހަމަ ނުވުމުން، ކިޔުންތެރިންނަށް އޮޅުންއަރާގޮތްވާ ކަމަށާއި، އެހެން ކަމުން ނޫސްވެރިން އެފަދަ ކަންތައްތަކަށް ސަމާލުކަން ދޭންޖެހޭކަމަށް މިނިސްޓަރު ވިދާޅުވިއެވެ.
" ވޯކް ޝޮޕް އޮން އެސެންޝިއަލްސް އޮފް ފައިނޭންޝިއަލް ޖަރނަލިޒަމް" ގެ ނަމުގައި ބޭއްވި ތަމްރީން ޕްރޮގްރާމްގައި ވަނީ ވިޔަފާރި ޚަބަރުތައް ގެނެސްދިނުމުގައި ސަމާލުކަންދޭން ޖެހޭނެ ކަންތައްތަކާއި ގުޅޭ މައުލޫމާތުދީފައެވެ.
ވިޔަފާރީގެ ދާއިރާގައި ހަރަކާތްތެރިވާ ނޫސްވެރިންނަށް އަމާޒުކޮށްގެން ކުރިއަށްގެންދިޔަ މި ތަމުރީނު ޕްރޮގްރާމުގައި ރާއްޖޭގެ އެކި މީޑިއާތަކުގައި މަސައްކަތްކުރާ ނޫސްވެރިން ވަނީ ބައިވެރިވެފައެވެ. މިފަދަ އިތުރު ތަމްރީން ޕްރޮގްރާމްތައް ކުރިއަށްއޮތްތަނުގައިވެސް ނޫސްވެރިންނަށް އަމާޒްކޮށް ކުރިއަށް ގެންދިޔުމަށް ރާވާފައިވާ ކަމަށް ފިނޭންސް މިނިސްޓްރީން ބުނެއެވެ.