އެމް.އައި.ޓީ.ޑީ.ސީގެ ހުއްދަނެތި އެއްވެސް ފަރާތަކުން، ބަރެސްދޫ އަދި މަހަކަންފުއްޓަށް، އެރުމަކީ މަނާކަމެއްކަމުގައި އެ ކުންފުނިން ހާމަކޮށްފިއެވެ.
ލ.އަތޮޅު ބަރެސްދޫއަކީ އިންޓަގްރޭޓަޑް ޓޫރިޒަމް މަޝްރޫޢުގެ ދަށުން ގެސްޓްހައުސް އައިލެންޑް ކޮންސެޕްޓަށް ތަރައްޤީކުރުމަށްޓަކައި ސަރުކާރުން އެމްއައިޓީޑީސީއާ ހަވާލުކޮށްފައިވާ ރަށެކެވެ.
މިކަމާއި ގުޅޭގޮތުން މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން ލިމިޓެޑް، އެމްއައިޓީޑީސީން ކޮށްފައިވާ އިއުލާނެއްގައި ބުނެފައިވަނީ ބަރެސްދޫގައި އިމާރާތްކުރުމުގެ މައިގަނޑު މަސައްކަތްތައް ފެށުމުގެ ކުރިން ޤާއިމްކުރަންޖެހޭ އަސާސީ ޚިދުމަތްތައް ޤާއިމްކުރުމުގެ މަސައްކަތް މިހާރު ކުރަމުން އަންނަކަމަށެވެ.
ބަރެސްދޫ އާއި އެރަށާއި ގުޅާލެވިފައިވާ މަހަކަންފުށީގައި އެމްޑަބުލިއުއެސްސީން ފެނާއި ނަރުދަމާގެ މަސައްކަތް ފަށާފައިވާއިރު، އެކުންފުނީގެ ހުއްދަނެތި އެއްވެސް ފަރާތަކުން، އެ ދެ ރަށަށް އެރުމަކީ މަނާކަމެއްކަމަށް އެމްއައިޓީޑީސީން ބުނެއެވެ.
ބަރެސްދޫގައި 2 ބީޗް ރިސޯޓާއިއެކު 34 ބީޗް ހޮޓާ ތަރައްޤީކުރުމަށް ވަނީ ހަމަޖެހިފައެވެ.
މީގެ އިތުރުން އެ ރަށުގައި ފަންސާހާ ގާތް ކުރާ އަދަދަކަށް ގެސްޓްހައުސް ތަރައްޤީކުރުމަށް ނިންމާފައިވާއިރު، މި ރަށުގައި 3،000 އެނދު ހުންނާނޭކަމަށް އެމްއައިޓީޑީސީން ބުނެއެވެ.