ރިޔާސީ އިންތިޚާބު ކާމިޔާބުކުރުމުގައި އެންމެ ބޮޑު ދައުރެއް އަދާކުރީ އެމްޑީޕީންކަމަށާ، ރައްޔިތުންގެ މަޖިލީހުގެ އިންތިޚާބުގައި އަޣުލަބިއްޔަތު އެމްޑީޕީއަށް ލިބުމަކީ މުހިންމުކަމެއްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ އެމްޑީޕީގެ މަޖިލިސް ޕްރައިމަރީއަށްފަހު އެމްޑީޕީ ގަރުގެ ކައިރީގައި ބޭއްވި ހަފްލާއެއްގައި ވާހަކަފުޅުދައްކަވަމުންނެވެ.
ރައީސް ޞާލިޙް ވިދާޅުވީ ކުރީގެ ސަރުކާރު ބަލިކޮށް މި ސަރުކާރު ވެރިކަމަށް އައީ ރައްޔިތުންގެ ވަރަށް ފޮނި އުންމީދުތަކާއި އެކުކަމަށެވެ. އަދި ރައްޔިތުން އެދޭ ކަންކަން ހާސިލު ކުރެވޭނީ މަޖިލީހުގެ އަޣުލަބިއްޔަތު ސަރުކާރަށް އޮވެގެން ކަމަށް ރައީސް ވިދާޅުވިއެވެ.
އެމްޑީޕީގެ ޕްރައިމެރީގައި ކާމިޔާބު ލިބުނު ބައެއް ފަރާތްތައް ބައިވެރިވި މި ހަފްލާގައި ވާހަކަދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ މިދިޔަ ރިޔާސީ އިންތިހާބުން ކާމިޔާބު ލިބުމުގައި ބޮޑު ދައުރެއް އަދާކުރީ އެމްޑީޕީން ކަމަށެވެ. އަދި ރިޔާސީ އިންތިހާބުގައި އެންމެ ގިނަ މަސައްކަތެއްކޮށް އެންމެ ބުރަކޮށް އުޅުނީވެސް އެމްޑީޕީގެ މެމްބަރުންކަމަށްވެސް ރައީސް ވިދާޅުވިއެވެ.
ރައީސް ޞާލިޙް ވަނީ އެމް.ޑީޕީ ހިމެނޭ ކޯލިޝަނެއްގެ ތެރެއިން އުފެދުނު ވެރިކަމުގައި ވެފައިވާ ވަޢުދުތައް ފުއްދުމަށް މަޖިލީހުގެ ތެރެއިން އެމް.ޑީ.ޕީއަށް މެޖޯރިޓީ ލިބުމަކީ މުހިންމުކަމެއްކަމަށް ވިދާޅުވެ އެ ވާހަކަފުޅު ތަކުރާރުކުރައްވާފައެވެ. އަދި ރާއްޖެ އަންނަނީ ޑިމޮކްރަސީއަށް ފައްކާވަމުންކަމަށާއި އެމްޑީޕީން ބޭއްވި ޕްރައިމެރީން އެމްޑީޕީ ޑިމޮކްރަސީ އާއި ގާތްކަން ފެނިގެން ހިގައްޖެކަމަށްވެސް އެމަނިކުފާނު ވިދާޅުވިއެވެ. އަދި މިއީ ބުރަ މަސައްކަތެއްކަމަށާއި އެކަމުގައި ބައިވެރިވި ހުރިހާ ފަރާތްކަށް ރައީސް ވަނީ ޝުކުރު އަދާކުރައްވާފައެވެ.
އަންނަ މަޖިލިސް އިންތިހާބުގައި އެމްޑީޕީން ބޮޑު މެޖޯރިޓީއެއް ހޯދަން ޖެހޭކަމަށް ރައީސް ރައީސް ޞާލިޙް ވިދާޅުވި މީ ފުރަތަމަ ފަހަރެވެ.