މުދަލާއި ޚިދުމަތުގެ އަގުން ނަގަމުން އަންނަ ޓެކްސް، ޖީ.އެސް.ޓީއާއި ގުޅޭގޮތުން ހޭލުންތެރިކުރުމުގެ ޕްރޮގްރާމެއް ބޭއްވުމަށް މީރާއިން ނިންމައިފިއެވެ.
މާދަމާއިން ފެށިގެން ދެދުވަހަށް ކުރިއަށްގެންދާ މި ޕްރޮގްރާމްގައި އަލަށް ވިޔަފާރި ރަޖިސްޓަރީ ކުރާ ފަރާތްތަކަށް ހާއްސަ ކޮށްގެން ބާއްވާ މައުލޫމާތު ދިނުމުގެ ސެޝަނަކާއި، ޓޫރިޒަމް ދާއިރާގައި އަލަށް ވިޔަފާރި ރަޖިސްޓަރީ ކުރާ ފަރާތްތަކަށް ހާއްސަ ކޮށްގެން ބާއްވާ މައުލޫމާތު ދިނުމުގެ ސެޝަންއެއް ކުރިއަށްގެންދިއުމަށް ވަނީ ހަމަޖެހިފައެވެ. މީގެ އިތުރުން މީރާއިން ބުނީ، މި ޕްރޮގްރާމުގައި މިރާ ކަނެކްޓް އާއި ގުޅޭ މައުލޫމާތު ދިނުމުގެ ސެޝަނެއްވެސް ހިމެނޭކަމަށެވެ.
މީރާއިން މިހާރުވަނީ، ވަކި ވަކި ޝެޝަންތަކަށް ރަޖިސްޓްރީވުމަށް ހުޅުވާލާފައެވެ.
މުދަލާއި ޚިދުމަތުގެ އަގުން ނެގޭ ޓެކްސް، ޖީ.އެސް.ޓީ އަކީ 02 އޮކްޓޫބަރު 2011 އިން ފެށިގެން، ދިވެހިރާއްޖޭގައި ވިއްކާ މުދަލާއި ދޭ ޚިދުމަތުގެ އަގުން ނެގޭ ޓެކުހެކެވެ. ޖީ.އެސް.ޓީ ނެގެނީ މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނުގެ ދަށުންނެވެ.