ފަނޑިޔާރުންނަށް ކުރެވޭ ތުހުމަތުތައް ބެލުމަށް ޖޭއެސްސީން އެކުލަވާލި ކޮމިޓީގެ ރައީސަކަށް، ބަންޑާރަ ނައިބު
ފަނޑިޔާރުން ޢައްޔަންކުރުމަށާއި ފަނޑިޔާރުންގެ މަސައްކަތަށް ނުފޫޒު ފޯރުވާފައިވާކަމަށް، ކުރެވޭ ތުހުމަތުތަކުގެ ޙަޤީޤަތް ހޯދުމަށް، ޖުޑީޝަލް ސާރވިސް ކޮމިޝަން (ޖޭއެސްސީ)އިން އެކުލަވާލި ކޮމިޓީގެ ރައީސަކަށް، ޖުޑީޝަލް ސަރވިސް ކޮމިޝަންގެ މެމްބަރު އަދި ދައުލަތުގެ ބަންޑާރަ ނައިބު އަލްއުސްތާޛު އިބްރާހިމް ރިފްޢަތު އައްޔަނުކުރައްވައިފިއެވެ.
ޖޭއެސްސީން ހާމަކުރައްވާގޮތުގައި މި ކޮމިޓީގެ މިއަދުގެ ބައްދަލުވުމުގައި، ވަނީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙްޤީޤުކުރާ ކޮމިޝަނުގެ ރައީސް އަލްއުސްތާޛު ޙުސްނުއް ސުއޫދު ފާހަގަކުރެއްވި ކަންތައްތަކުގެ ހަޤީޤަތް ހޯދައި، ކަމާގުޅުންހުރި ފަރާތްތަކާ ގުޅިގެން އަޅަންޖެހޭ ފިޔަވަޅުތައް އެޅުމަށްޓަކައި އެކަންކަމުގެ މަޢުލޫމާތާއި އަދި ގުޅުންހުރި ހެކިތަކުގެ މަޢުލޫމާތު ހޯދުމަށް ނިންމާފައެވެ.
އަދި މީގެ އިތުރުން ޙުސްނުއްސުއޫދުގެ ފަރާތުން ފޯރުކޮށްދެވެންހުރި މަޢުލޫމާތާއި ހެކި ހިއްސާކޮށްދެއްވުމަށް ދެންނެވުމަށާއި އަދި ދަޢުލަތުގެ ތަޙްޤީޤީ އިދާރާތަކުންނާއި އެހެނިހެން ފަރާތްތަކުން މަޢޫލޫމާތު ހޯދުމަށްވެސް މިބައްދަލުވުމުގައި ނިންމާފައިވާކަމަށް ޖޭއެސްސީން ވިދާޅުވެއެވެ.
ފަނޑިޔާރުންނާ މެދު ކުރެވިފައިވާ ތުހުމަތުތަކަކީ ރައްޔިތުންގެ ނުހަނު ކަންބޮޑުވުންތައް އެކަމުގައި ޝާމިލްވާ ކަމަކަށްވާތީއާއި އެކަމުގެ ހަޤީޤަތް ހޯދުމަކީ ފަނޑިޔާރުންގެ ނަޒާހަތްތެރިކަން ކަށަވަރުކޮށް، ޖުޑިޝަރީއާމެދު އޮންނަ އިތުބާރު ދެމެހެއްޓުމަށް މުހިންމު ކަމެއްކަމަށްވާތީ، ކޮމިޓީގެ މަސައްކަތް ހަލުވިކަމާއެކު ކުރިއަށް ގެންދިއުމަށް ނިންމައި ކޮމިޓީގެ މަސައްކަތް ކުރިއަށްދާގޮތް ޢާންމުކޮށް ހާމަކުރަމުންގެންދިއުމަށް ނިންމަވާފައިވާކަމަށްވެސް ޖޭއެސްސީން ވިދާޅުވެއެވެ.