ސިޔާސީ ސަބަބުތަކަށްޓަކައި ފިޔަވަޅު އަޅާފައިވާ ފަރާތްތަކުން ޝަކުވާ ހުށަހެޅުމުގެ މުއްދަތު އިތުރުކުރައްވައިފި
ސިޔާސީ މަޤުޞަދެއް ޙާސިލުކުރުމަށްޓަކައި 2012 ވަނަ އަހަރުގެ ފެބްރުއަރީ މަހުގެ ފަހުން، ބަންދުކޮށް، ޖިނާއީ ޢަދުލުގެ ނިޒާމުގެ ތެރެއިން އެކިއެކި ފިޔަވަޅު އަޅައިފައިވާ ފަރާތްތަކާއި، އެކިއެކި ޙުކުމްތައްކޮށް، އެޙުކުމްތައް ތަންފީޛުކުރަމުންދާ ފަރާތްތަކުން ޝަކުވާ ހުށަހެޅުމަށް ހުޅުވައިލި މުއްދަތު އިތުރުކުރައްވައިފިއެވެ.
މިކަމަށްޓަކައި ރައީސުލްޖުމްހޫރިއްޔާގެ އޮފީހުން ކުރިން ހުޅުވާލި ފުރުސަތު މިހާރު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ މިމަހުގެ 22ވަނަ ދުވަހުގެ 14:00ގެ ނިޔަލަށް އިތުރުކުރައްވާފައި ކަަމަށް ރައީސް އޮފީހުން ހާމަކުރައްވައެވެ.
ޝަކުވާ ހުށަހެޅުމުގެ މުއްދަތު އިތުރުކުރައްވާފައިވަނީ މިމުއްދަތު އިތުރު ކޮށްދިނުމަށް ގިނަބަޔަކު އެދެމުންދާތީކަމުގައި ރައީސް އޮފީހުން ވިދާޅުވެއެވެ.
ސިޔާސީ މަޤުޞަދެއް ޙާސިލުކުރުމަށްޓަކައި 2012 ވަނަ އަހަރުގެ ފެބްރުއަރީ މަހުގެ ފަހުން، ބަންދުކޮށް، ޖިނާއީ ޢަދުލުގެ ނިޒާމުގެ ތެރެއިން އެކިއެކި ފިޔަވަޅު އަޅައިފައިވާ ފަރާތްތަކާއި، އެކިއެކި ޙުކުމްތައްކޮށް، އެޙުކުމްތައް ތަންފީޛުކުރަމުންދާ ފަރާތްތަކުން ޝަކުވާ ހުށަހެޅުމަށް ކުރިން ހުޅުވާލީ ފާއިތުވި ޑިސެމްބަރުމަހުގެ 6 އިން ފެށިގެން އެމަހުގެ 30ވަނަ ދުވަހުގެ ނިޔަލަށެވެ.
ސިޔާސީ ހައްޔަރީންގެ މައްސަލަތައް ބަލައި، ނުޙައްޤުން ބަންދުކޮށްފައިވާ ފަރާތްތައް މިނިވަންކުރުމަށް ރައީސުލްޖުމްހޫރިއްޔާ ވެވަޑައިގެންފައިވާ ރިޔާސީ ވަޢުދުފުޅު ފުއްދެވުމުގެގޮތުން، އެކަމަށް ޚާއްޞަ ކޮމިޓީއެއް އުފައްދަވައި، އެމަނިކުފާނު މަޤާމާ ހަވާލުވެވަޑައިގެންނެވި ފުރަތަމަ ދުވަހު ވަނީ އެ މަސައްކަތްޕުޅު ފަށްޓަވާފައެވެ.