ކްރިމިނަލްކޯޓުގެ ފަނޑިޔާރުންނާއި ގުޅޭގޮތުން މަރުގެ މައްސަލަތައް ބަލާ ކޮމިޝަންގެ ރައީސް ދެއްކެވި ވާހަތަކަކީ މިނިވަން ޖުޑިޝަރީ އަޅުވެތިކުރުމަށް ދެއްކެވި ސާބިތުނުހިފޭ ވާހަތަކެއްކަމަށް ބުނެ ކުރިމިނަލްކޯޓުން އިންޒާރު ދީފިއެވެ.
ކުރިމިނަލްކޯޓްގެ މި އިންޒާރު އައިސްފައި މިވަނީ މަރުތައް ބެލުމަށް އެކުލަވާލި ކޮމިޝަންގެ ރައީސް ޙުސްނުއްސުޢޫދު ދެއްކެވި ވާހަކަތަކާއި ގުޅިގެން އެ ވާހަކަތައް ރައްދުދީ އެ ކޯޓުން ނެރުނު ނޫސްބަޔާނެއްގައެވެ.
ކުރިމިނަލްކޯޓުން ނެރުނު ބަޔާނުގައި ބުނެފައިވަނީ އެކޯޓްގެ ފަނޑިޔާރުންނާއި ގޭންގްތައް ގުޅިގެން މައްސަލަތައް ސާބިތުނުކޮށް ދޫކޮށްލާފައިވާކަމަށް ތުހުމަތުކޮށް މަރުތައް ބެލުމަށް އެކުލަވާލި ކޮމިޝަންގެ ރައީސް ޙުސްނުއްސުޢޫދު ދައްކަވާފައިވާ ވާހަތަކަކީ ސާބިތުނުހިފޭ ދޮގު ވާހަތަކެއްކަމަށެވެ. އަދި އެކަން ސުޢޫދު ކުރައްވާފައިވަނީ ލިބިފައިވާ ރަސްމީ ހައިސިއްޔަތުގެ ބޭނުން ނަހަމު ގޮތުގައި ހިފައިގެން ނާޖައިޒު މަންފާތަކެއް ހޯދާ، ޤައުމު ހަލަބޮލިކޮށް، މިނިވަން ޖުޑިޝަރީ އަޅުވެތިކުރުމަށް ދައްކާފައިވާ ބިރުވެރ ނުރައްކާތެރި ވާހަތަކެއްކަމަށެވެ. އަދި އެ ވާހަތަކަކީ ޢަދުލުގެ ނިޒާމާމެދު ޢާއްމުންގެ ހިތްތަކުގައި ނަފްރަތު އުފައްދާ ޝަރުޢީ ނިޒާމުގެ ޙުރުމަތް ގެއްލުވާލާ ކޯޓްތަކުގެ ބާރުތައް ކަނޑުވާލުމުގެ ބޭނުމުގައި ދައްކާފައިވާ ވާހަތަކެއްކަމަށެވެ.
މަރުތަކުގެ މައްސަލަތައް ބެލުމަށް ރައީސް އެކުލަވާލެއްވި ކޮމިޝަންގެ ދައުރަކީ ވަކި މައްސަލަތަކެއް ތަޙްޤީޤުކުރުންކަމަށްވާއިރު ކޮމިޝަންގެ އިޚްތިޞާޞްގެ ބޭރުން އެ ކޮމިޝަނުން ދައްކާފައިވާ ވާހަކަތައް ކުށްވެރިކުރާކަމަށްވެސް ކުރިމިނަލްކޯޓްގެ ނޫސްބަޔާނުގައިވެއެވެ. އަދި ކުރިމިނލްކޯޓަށް މައްސަލަ ހުށައަޅައިގެން އިންސާފު ނުލިބޭނެކަމަށް ޙުސްނުއްސުޢޫދު ވިދާޅުވެފައިވާ ވިދާޅުވުމަކީ ޒިންމާދާރުކަން ކުޑަ ގޮތެއްގައި ދެއްކި ވާހަތަކެއްކަމަށާއި ޖިނާއީ ޢަދުލުގެ ނިޒާމާމެދު ޢާއްމުންގެ ހިތްތަކުގައި ނުބައި ތަޞައްވަރެއްދީ ފަނޑިޔާރުންގެ ޙުރުމަތް ކެނޑޭނޭހެން ކުރާ ކަންކަން ބަލަމުންދާނެކަމުގެ އިންޒާރުވެސް ކުރިމިނަލްކޯޓުން ވަނީ ދީފައެވެ.
މަރުގެ މައްސަލަތައް ބަލާ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަންގެ ރައީސް ޙުސްނުއްސުޢޫދު ވިދާޅުވީ ކުރިމިނަލްކޯޓަށް މައްސަލަތައް ހުށައަޅައިގެން އިންސާފުވެރި ހައްލެއް ނުލިބޭނެކަމަށެވެ. އަދި އެކޯޓްގެ ފަނޑިޔާރުންނަށް ވަނީ ވިޔަފާރިވެރިންނާއި ގޭންގްތަކުގެ ނުފޫޒު ފޯރާފައިވާކަމަށްވެސް ސުއޫދު ވަނީ ތުހުމަތުކުރައްވާފައެވެ.