މޯލްޑިވްސް ގެޓަވޭޒްއިން ހިންގާ ޓްރެވަލް ޓްރޭޑް މޯލްޑިވްސް، ޓީ.ޓީ.އެމްއިން ފަތުރުވެރިކަމުގެ ދާއިރާއާ ގުޅުން ހުރި ބައިނަލްއަޤްވާމީ މަޖައްލާއެއް ނެރެން ނިންމައިފިއެވެ.
މޯލްޑިވްސް ގެޓަވޭޒްއިން ބުނީ މިމަޖައްލާއަކީ ރާއްޖޭގެ ފަތުރުވެރިކަމާބެހޭ އެންމެ ފަހުގެ މައުލޫމާތާއި، ވަކިވަކި ކުންފުނިތަކާއި، ފަތުރުވެރިކަމުގެ ހިދުމަތްދޭ ފަރާތްތަކުގެ ހަބަރާއި މައުލޫމާތު ހިމެނޭނެ މަޖައްލާއެއް ކަމަށެވެ. އަދި މިމަޖައްލާ ނެރޭނީ ދެމަހުން އެއްމަހުން ކަމަށާއި މިމަޖައްލާ ކަރުދާހުގައާއި އޮންލައިންކޮށްވެސް ތައްޔާރުކުރާނެކަމަށް އެފަރާތުން ބުނޭ. މޯލްޑިވްސް ގެޓަވޭޒްއިން ބުނީ މިމަޖައްލާ ދުނިޔޭގެ 30 ޤައުމެއްގައި ތިބި ޓީޓީއެމްއާއި ގުޅުން ޤައިމްކޮށްފައިވާ ފަތުރުވެރިކަމާބެހޭ އެޖެންޓުންނަށް ބަހާނެ ކަމަށެވެ.
ގެޓަވޭޒްއިން ބުނީ މިމަޖައްލާގައި ރާއްޖޭގެ ފަތުރުވެރިކަމުގެ ދާއިރާގެ އެކި ސެގްމަންޓުތައް ހިމެނޭނެކަމަށެވެ. މިގޮތުން ދާއިރާގެ ހަބަރާއި މައުލޫމާތު ހިމެނޭ މިމަޖައްލާގައި ސަރުކާރުގެ ވުޒާރާތަކުގެ މަސައްކަތްތަކާއި، ރިޒޯޓު، ގެސްޓްހައުސް، ކްރޫޒް ލައިނަރ، ފަތުރުވެރިކަމުގެ އެހެން ހިދުމަތްދޭ ފަރާތްތަކުގެ މައުލޫމަތާއި ހަބަރު ހިމެނޭނެ ކަމަށް ޓީޓީއެމްއިން ބުންޏެވެ.
މި އަންނަ އަހަރު ޖެނުއަރީ މަހު ނެރެންފަށާ މިމަޖައްލާ ނެރުމުގެ އެންމެ ބޮޑު މަޤްސަދަކީ ރާއްޖެ ފަތުރުވެރިކަމުގެ މަންޒިލެއްގެ ގޮތުން އިޝްތިހާރުކުރުމަށް ކުރާ މަސައްކަތް އިތުރަށް ހަރުދަނާ ކުރުންކަމަށް ގެޓަވޭޒްއިން ބުންޏެވެ.
2017 މޯލްޑިވްސް ގެޓަވޭޒްއިން އިންތިޒާމް ކުރަންފެށި ޓީޓީއެމް ރާއްޖޭގައި ބާއްވާ އެންމެ ބޮޑު ފަތުރުވެރިކަމުގެ ވިޔަފާރިތައް ބައިވެރިވާ ފެއަރއެވެ.
މިޝޯވގެ ތިންވަނަ ބައި މިއަންނަ އަހަރު އޭޕްރިލް މަހު 20 ވަނަ ދުވަހުން 22 ވަނަ ދުވަހަށް ބޭއްވުމަށް ވަނީ ހަމަޖެހިފައެވެ. ޓީޓީއެމް 2019 ގައި ރިސޯޓު ހޮޓާ ހިމެނޭހެން 150 އަށްވުރެ ގިނަ އެގްޒިބިޓަރުންނާއި 200 އަށްވުރެ ގިނަ ޓްރެވަލް އެޖެންޓުން ބައިވެރިވާނެކަމަށް ގެޓަވޭޒްއިން މައުލޫމާތުދެއެވެ. އަދި ޓީޓީއެމް 2019 އަށް ރާއްޖޭއަށް އެންމެ ގިނައިން ފަތުރުވެރިން ޒިޔާރަތްކުރާ 30 ޤައުމުގެ އެޖެންޓުން ގެނައުމަށްވެސް ދަނީ މަސައްކަތް ކުރަމުންނެވެ.