ރާއްޖޭގައި ބޭރުގެ އެއްވެސް ޤައުމެއްގެ އަސްކަރީ މަރުކަޒެއް ހަދަން ފުރުސަތު ނުދެއްވާނެކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ފޮރިން މިނިސްޓަރ ޝާހިދު މިހެން ވިދާޅުވެފައިމިވަނީ ދާއިމީ ގޮތެއްގައި ރާއްޖޭގައި އިންޑިއާގެ ސިފައިން ތިބޭގޮތަށް ހަމަޖައްސައިފިނަމަ ދަރަނިތައް އަދާކުރުމަށް އިންޑިއާއިން ރާއްޖެއަށް 1 ބިލިއަން ޑޮލަރު ދޭން ބުނިކަމަށް ޖަޕާނުގެ ނޫހެއްގައި ބުނެފައިވަނިކޮށެވެ.
ފޮރިން މިނިސްޓަރ ހަވާލުވެޑަގަތުމަށްފަހު ރާއްޖެއިން ބޭރަށް ކުރައްވަމުން ގެންދަވާ ދަތުރުފުޅެއްގައި ހުންނަވާ ކުރެއްވި ޓްވީޓެއްގައި މިނިސްޓަރ ޝާހިދު ވަނީ މީޑއާތަކުގައި ދައްކަމުން ގެންދާ ވާހަކަތަކަށް ރައްދުދެއްވާފައެވެ.
މިނިސްޓަރ ޝާހިދުގެ ޓްވީޓްގައި ވިދާޅުވެފައިވަނީ ރާއްޖެއިން ބޭރުގެ އެހީ ހޯދާނީ ރާއްޖޭގެ މިނިވަންކަމާއި އިސްތިޤުލާލަށް ބުރުލެއް ނާރާނެ ގޮތުގެ މަތިންކަމަށެވެ. އަދި ރާއްޖޭގައި އެއްވެސް ބޭރުގެ ޤައުމެއްގެ އަސްކަރީ މަރުކަޒެއް ހަދަން ފުރުސަތު ނުދެއްވާނެކަމަށާއި އެ ފަދަ އެއްބަސްވުމެއް އެއްވެސް ޤައުމަކާއި ނުހައްދައްވާނެކަމަށް ވެސް މިނިސްޓަރ ޝާހިދު ކުރެއްވި ޓްވީޓްގައި ވިދާޅުވެފައިވެއެވެ.
މަޤާމާއި ހަވާލުވެޑައިގަތުމަށްފަހު ރާއްޖެއިން ބޭރަށް ކުރައްވާ ދަތުފުޅެއްގައި މިހާރު ހުންނެވީ ޔޫއެއީގައެވެ. މަޤާމާއި ހަވާލުވެޑައިގަތުމަށްފަހު ރާއްޖެއިން ބޭރަށް ކުރައްވާ ދަތުފުޅެއްގައި މިހާރު ހުންނެވީ ޔޫއެއީގައެވެ. މި ދަތުރުފުޅުގައި ފޮރިން މިނިސްޓަރ ޝާހިދު ފުރަތަމަ ވަޑާއިގަތީ އަވައްޓެރި އިންޑިއާށެވެ.
އިންޑިއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ޔޫއޭއީއަށް ފުރާވަޑައިގަތުމުގެ ކުރިން ފޮރިން މިނިސްޓަރ ކުރެއްވި ޓުވީޓެއްގައި ވިދާޅުވީ، އިންޑިއާއަށް ކުރެއްވި ދަތުރުފުޅަކީ ވަރަށް ކާމިޔާބު ދަތުރުފުޅެއްކަމަށެވެ. އަދި ރައީސް ޞާލިޙު އަންނަ މަހު އިންޑިއާއަށް ވަޑައިގަންނަވާ ގޮތަށް ހަމަޖެހިފައިވާތީ އެމަނިކުފާނަށް މަރުޙަބާ ދެންނެވުމަށް އިންޑިއާއިން ތައްޔާރަށް އޮތް ކަމަށެވެ.
ޔޫއޭއީގެ ދަތުރުފުޅާއި ގުޅޭގޮތުން މިނިސްޓަރ ވިދާޅުވީ ޔޫއޭއީގެ އަބޫދާބީއަށް ކުރައްވާ ދަތުރުފުޅުގައި އެޤައުމުގެ އިސްވެރިންނާއި ބައްދަލުކުރައްވާ މުހިންމު މަޝްވަރާތަކެއް ކުރައްވަން ހަމަޖެހިފައިވާކަމަށެވެ. ޚާއްޞަކޮށް ދެ ޤައުމުގެ ދެމެދު އޮތް ގުޅުން އިތުރަށް ބަދަހިކުރުމާއި ގުޅޭގޮތުން މަޝްވަރާ ކުރައްވާނެކަމަށް ފޮރިން މިނިސްޓަރ ވިދާޅުވިއެވެ.
ފޮރިން މިނިސްޓަރ ޢަބްދުﷲ ޝާހިދު އިންޑިއާއަށް ކުރެއްވި ރަސްމީ ދަތުރުފުޅުގައި ވަނީ އެޤައުމުގެ ރައީސް ރާމްނާތު ކޯވިންދާއި، އެޤައުމުގެ އިސް ވަފްދުގެ ބޭފުޅުންނާއި ބައްދަލުކުރައްވާފައެވެ. އަދި އެކި ދާއިރާތަކުން ރާއްޖެއަށް އެހީތެރިކަން ފޯރުކޮށްދިނުމަށްވެސް ވަނީ މަޝްވަރާކޮށްފައެވެ. އެގޮތުން އިޤްތިޞާދީ ރޮނގުންނާއި، އިޖުތުމާޢީ ދާއިރާއިން އެހީތެރިވެދިނުމާއި ގުޅޭގޮތުން ވަނީ މަޝްވަރާ ކުރައްވާފައެވެ.
ފޮރިން މިނިސްޓަރ އިންޑިއާއަށް ކުރެއްވި ދަތުރުފުޅުގައި ދިވެހިންނަށް އިންޑިއާގެ ވިސާ ފަސޭހައިން ލިބޭނެ އިންތިޒާމް ހަމަޖައްސާނެކަމުގެ ޔަޤީންކަން އެޤައުމުން ވަނީ ފޮރިން މިނިސްޓަރަށް ދެއްވާފައެވެ.