ރާއްޖޭގެ އެތެރޭގެ އުދުހުންތަކަށް ޚާއްސަކޮށްގެން ތަޢާރަފްކުރާ 3 ވަނަ އެއާލައިން "މަންތާ އެއާރ" ރަސްމީކޮށް އިފްތިތާޙުކޮށްފިއެވެ.
ދަރުބާރުގޭގައި ބޭއްވި ޚާއްސަ ރަސްމިއްޔާތެއްގައި މަންތާ އެއާރ ރަސްމީކޮށް އިފްތިތާޙުކޮށްދެއްވީ ރައިސުލްޖުމްހޫރިއްޔާގެ ނައިބު ފައިސަލް ނަސީމެވެ.
މަންތާ އެއާރ އިފްތިތާޙުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މަންތާ އެއާރގެ ސީއީއޯ މުހައްމަދު ޚަލީލް ވިދާޅުވީ މަންތާ އެއާރ ވެގެންދާނީ ރާއްޖޭގެ އެތެރޭގެ އުދުހުންތަކުގެ ޚިދުމަތް އިތުރު ހަރުފަތަކަށް ގެންދާނެ އެއާރލައިނަކަށް ކަަމަށެވެ. އަދި މަންތާ އެއަރގެ ޚިދުމަތް ރަނގަޅު ކުރުމަށްޓަކައި ފެންވަރު ރަނގަޅު މުވައްޒަފުން ނަގާފައިވާއިރު އޭގެތެރެއިން އަށްޑިހަ އިންސައްތަ މުވައްޒަފުންނަކީ ދިވެހި މުވައްޒަފުންކަން ޚަލީލް ފާހަގަކުރެއްވިއެވެ.
ޚަލީލް ވިދާޅުވީ އޭވިއޭޝަން ދާއިރާ ކުރިއަރާފައިވީ ނަމަވެސް ރާއްޖެ އަންނަ ފަތުރުވެރިންނަށް ދަތުރުފަތުރުގެ ދަތިކަން ކުރިމަތިވަމުން އަންނަކަމަށެވެ. އަދި މިކަން ހައްލު ކުރެވޭނީ ހުރިހާ އެއާރލައިނަކުން ވާދަވެރި ރޫހެއްގައި މަސައްކަތްކޮށްގެން ކަމަށްވެސް ޚަލީލް ވިދާޅުވިއެވެ.
ރާއްޖޭގައި އަލަށްފަށާ މަންތާ އެއާރ އިފްތިތާޙުކޮށްފައިވާއިރު މި ހަފްލާގައި މަންތާ އެއާރގެ ބްރޭންޑް އެމްބެސަޑަރުންގެ ގޮތުގައި ދެ ލަވަކިޔުންތެރިންކަމަށްވާ މަރިޔަމް މައީޝާއާއި އަލީ އަރުޝަދް ވަނީ ހަމަޖައްސާފައެވެ. އަދި މަންތާ އެއާގެ މުވައްޒަފުން ބޭނުންކުރާ ޔުނިފޯރމްވެސް މިރަސްމިއްޔާތުގައި ދައްކާލިއެވެ.
މަންތާ އެއާރ އިފްތިތާޙުކޮށްފައިވާއިރު މި އެއާރލައިންގެ ދަތުރުތައް ފަށަން ހަމަޖެހިފައިވަނީ އަންނަ ޑިސެމްބަރު މަހުގައެވެ. މި ދަތުރުތަކުގައި ބޭނުންކުރަން މަންތާ އެއާރއިން ވަނީ ދެ މަތިންދާބޯޓެއް ގަނެފައެވެ. މީގެ ތެރެއިން ފުރަތަމަ ބޯޓު މިމަހުގެ ކުރީކޮޅު ރާއްޖެ އައިސްފައިވާއިރު ދެވަނަ ބޯޓު އަންނަ ޑިސެމްބަރުމަހުގެ މެދުތެރޭގައި އަންނާނެކަމަށް މަންތާ އެއާރއިން ބުނެއެވެ.
މަންތާ އެއާރ އިފްތިތާޙުކުރުމަށް ބޭއްވި ރަސްމިއްޔާތުގައި ނައިބު ރައީސް ފައިސަލް ނަސީމްގެ އިތުރުން ޓޫރިޒަމް މިނިސްޓަރ އަލީ ވަހީދާއި ފަތުރުވެރިކަމުގެ ދާއިރާގައި ހަރަކާތްތެރިވާ ގިނަ ފަރާތްތަކަކުން ބައިވެރިވެވަޑައިގެންނެވިއެވެ.