އިންތިޚާބީ ރައީސް އިބްރާހިމް މުހައްމަދު ސާލިހުގެ ކެބިނެޓަށް ވަޒީރުން އައްޔަންކުރުމުގެ ރަސްމިއްޔާތު މިރޭ އޮންނާނެކަމަށް ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުން ބުނީ އިންތިޚާބީ ރައީސް އިބްރާހީމް މުޙައްމަދު ޞާލިޙު، ރައީސުލްޖުމްހޫރިއްޔާ ކަމުގެ މަޤާމުގެ ހުވާ ކުރެއްވުމަށްފަހު، އެމަނިކުފާނު އެކުލަވައިލައްވާ ސަރުކާރުގެ ވަޒީރުންގެ މަޖިލީހަށް ޢައްޔަނު ކުރައްވާ މެންބަރުން، މަޤާމުގެ ޤާނޫނީ ހުވާކުރެއްވުމާއި، އެބޭފުޅުންނަށް މަޤާމުގެ ފަތްކޮޅު ދެއްވުމުގެ ރަސްމިއްޔާތު މިރޭ ރައީސުލްޖުމްހޫރިއްޔާގެ އޮފީހުގައި އޮންނާނެއެވެ.
އިބްރާހީމް މުޙައްމަދު ޞާލިޙުގެ ކެބިނެޓަށް ޢައްޔަނު ކުރައްވަނީ އެޓަރނީ ޖެނެރަލްގެ އިތުރުން، 19 ވަޒީރުންނެވެ.
ވަޒީރުންގެ މަޖިލީހަށް މެންބަރުން ޢައްޔަނު ކުރެއްވުމުގެ ރަސްމިއްޔާތަށްފަހު، ރައީސުލްޖުމްހޫރިއްޔާގެ އޮފީހުގެ އެންމެ އިސް މަޤާމުތަކަށް ޢައްޔަނު ކުރައްވާ ބޭފުޅުންނަށް މަޤާމުގެ ފަތްކޮޅު ދެއްވުންވެސް މިރޭ އޮންނާނެކަމަށް ރައީސް އޮފީހުން ބުނެއެވެ.
އައު ސަރުކާރުގެ ވަޒީރުންގެ މަޖިލީހަށް ވަޒީރުން އައްޔަންކުރުން މިރޭ އޮންނައިރު، ވަޒީރުން އައްޔަނުކުރާނީ ކޯލިޝަންގައި ހިމެނޭ ޕާޓީތަކުގެ ލީޑަރުންގެ މަޝްވަރާގެ މަތިންކަމަށް އިންތިޚާބީ ރައީސް އިބްރާހިމް މުހައްމަދު ސާލިހު ވަނީ ވިދާޅުވެފައެވެ.