"އެންޓި-ޑިފެކްޝަން ޤާނޫނު" އުވާލުމުގެ ބިލު، ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްޤައްޔޫމް ތަޞްދީޤު ކުރައްވައިފިއެވެ.
އެންޓި-ޑިފެކްޝަން ޤާނޫނަކީ ރައްޔިތުންގެ މަޖިލީހުގެ މެންބަރުން އިންތިޚާބުވާ ޕާޓީ ބަދަލުކޮށްފިނަމަ ނުވަތަ ޕާޓީން ވަކިވެއްޖެނަމަ ނުވަތަ ވަކިކޮށްފިނަމަ ރައްޔިތުންގެ މަޖިލީހުގެ މެންބަރުކަން ގެއްލޭގޮތަށް ފާސްކޮށްފައިވާ ޤާނޫނެކެވެ.
މިޤާނޫނު އުވާލުމަށް މަޖިލީހަށް މިދިޔަމަހުގެ 24 ވަނަ ދުވަހު ހުށަހެޅުއްވީ ޕީޕީއެމްގެ ޕާލަމެންޓްރީ ގްރޫޕްގެ ޑެޕިއުޓީ ލީޑަރު އަދި ވިލުފުށީ ދާއިރާގެ މެމްބަރު ރިޔާޒް ރަޝީދުއެވެ. މިޤާނޫނު އުވާލުމަށް ރައްޔިތުންގެ މަޖިލީހުން ފާސްކުރީ މިމަހުގެ 1 ވަނަ ދުވަހުއެވެ.
އެންޓި-ޑިފެކްޝަން ޤާނޫނު އުވާލުމުގެ ބިލު، ރައީސުލްޖުމްހޫރިއްޔާ ތަޞްދީޤުކުރެއްވުމާ ގުޅިގެން މި ޤާނޫނު މިހާރު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވާފައެވެ.