ނުފޫޒުން އެއްކިބާވެ ވެރިކަން ކުރެއްވުމުގެ ފުރުސަތު އިންތިޚާބީ ރައީސަށް ދޭންޖެހޭ - ޑިފެންސް މިނިސްޓަރ
އެއްވެސް ފަރާތެއްގެ ނުފޫޒެއްނެތި ވެރިކަންކުރުމުގެ ފުރުސަތު އިންތިޚާބީ ރައީސް އިބްރާހީމް މުޙައްމަދު ޞާލިޙަށް ދޭންޖެހޭކަމަށް މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ގދ.ތިނަދޫ ފަޔަރ ސްޓޭޝަން ހުޅުވުމަށް ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ.
ގދ.ތިނަދޫ ފަޔަރ ސްޓޭޝަން ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޑިފެންސް މިނިސްޓަރ އާދަމް ޝަރީފު ޢުމަރު ވިދާޅުވީ ރާއްޖޭގައި އޮތީ ޖުމްހޫރީ ނިޒާމަކަށްވާއިރު، މިނިޒާމުގައި ވެރިކަން ކުރަންޖެހޭނީ ރައްޔިތުން ބޭނުންވާ މީހަކުކަމަށެވެ. އަދި ކުރިއަށް އޮތް ފަސްއަހަރުދުވަހަށް ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް ރައްޔިތުން އިންތިޚާބުކުރީ އިބްރާހީމް މުޙައްމަދު ޞާލިޙު ކަމަށާއި އެމަނިކުފަނުގެ ފަސްއަހަރު ނުފޫޒަކާނުލައި ވެރިކަން ކުރިއަށްގެންދިޔުމުގެ ޖާގަ އެމަނިކުފާނަށް ދޭންޖެހޭކަމަށެވެ.
އަދި ވެރިކަމަށް ވަޑައިގަންނަ ބޭފުޅާ ވަޑައިގަންނަވަނީ މެނިފެސްޓޯއަކާއެކު ކަމަށްވާއިރު މެނިފެސްޓޯއާ ގުޅިގެން އެހެން ފަރާތްތަކުން އުސޫލު ކަނޑައެޅުމަކީ ޤައުމުގެ ކުރިއެރުމަށް ބުރޫއަރާނެކަމެއްކަން މިނިސްޓަރ ފާހަގަކުރެއްވިއެވެ.
އަދި މިހާރަށްވުރެ ހަލުވި މިނެއްގައި ޤައުމު ކުރިއަށް ގެންދިޔުމަށް އެއްބައިވަންތަކަން ބޭނުންވާކަމަށާ، އިންތިޚާބީ ރައީސްގެ ފަރާތްޕުޅުން އެކަމަށްޓަކައި މަސައްކަތްކުރައްވާތަން ފެނިގެންދާނެކަމަށް އުއްމީދުކުރައްވާކަމުގައި މިނިސްޓަރ ވިދާޅުވިއެވެ. އަދި ވެރިކަމުގެ ނިޒާމު މާބޮޑަށް މަސްހުނިވެއްޖެނަމަ ވެރިކަމުގެ ނިޒާމުން ރައްޔިތުންނަށް ކުރަންޖެހޭ ފައިދާ ނުކުރާނެކަން މިނިސްޓަރ ފާހަގަކުރެއްވިއެވެ.
ދިވެހި ޖުމުހޫރިއްޔާއަށް ފަންސާސް އަހަރު ފުރުމާ ގުޅޭގޮތުން ވާހަކަފުޅުދައްކަވަމުން މިނިސްޓަރ ވިދާޅުވީ ފިތުނަ ފަސާދަ އުފެއްދުމަކީ ޤައުމުގެ ތަރައްޤީއާއި ކުރިއެރުމަށް އޮތް ހުރަހެއްކަމަށާ ބޭރުގެ ބާރުތަކާއި ނުފޫޒުތަކުން ޤައުމު ސަލާމަތްކުރުމަށްޓަކައި ފިތުނަ ފަސާދައިން އެންމެ ސަލާމަތް ވާންޖެހޭކަމަށެވެ.