މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް، (މިފްކޯ) އަށް މާލީގޮތުން ދިމާވެފައިވާ ދަތިތަކުން އަރައިގަތުމަށްޓަކައި ސަތޭކަ ސާޅީސް އެއް މިލިއަނަށްވުރެ ގިނަ ރުފިޔާ، ކެޕިޓަލްގެ ގޮތުގައި އެކުންފުންޏަށް ދީފައިވާނެކަމަށް ސަރުކާރުން ބުނެފިއެވެ.
މިކަން ހާމަކޮށް ފިނޭންސް މިނިސްޓްރީން ޢާންމުކުރި ނޫސްބަޔާނުގައި ބުނެފައިވަނީ 2013 ވަނަ އަހަރުން ފެށިގެން މިއަހަރުގެ ނިޔަލަށް ސަތޭކަ ސާޅީސް އެއް މިލިޔަން ފަސްސަތޭކަ ސާޅީސް ހަ ހާސް ދުއިސައްތަ އެގާރަ ރުފިޔާ ކެޕިޓަލްގެ ގޮތުގައި މިފްކޯއަށް ދީފައިވާކަމަށެވެ.
ސްޓޭޓް ޓްރޭޑިންގ އޯގަނައިޒޭޝަންގެ ދަށަށް މިފްކޯ ބަދަލުކުރި އިރު ކުންފުނީގެ މާލީ ޙާލަތު ހުރި ގޮތުން ސަރުކާރުން މިއަހަރުގެ އެޕްރީލްމަހުގެ ނިޔަލަށް ތިންސަތޭކަ ތިރީސް ތިން މިލިއަން ހަ ސަތޭކަ ތިރީސް ދެ ހާސް ދުއިސައްތަ ފަންސާސް ހަ ރުފިޔާ ދީފައިވާއިރު އެސް.ޓީ.އޯގެ ދަށަށް ބަދަލު ކުރިއިރު ކުންފުނީގެ ދަރަނީގެ ގޮތުގައި ހުރި ފައިސާ އެއްކޮށް ދައްކާފައިވާކަމަށް ފިނޭންސް މިނިސްޓްރީން ބުނެއެވެ.
މީގެ އިތުރުން ސަރުކާރުން 100 މިލިއަން ރުފިޔާގެ ފަންޑެއް ހަދައި އެ ފަންޑަށް ސަރުކާރުން ލޯނުގެ ގޮތުގައި 50 މިލިއަން ރުފިޔާ ލުމަށް އެއްބަސްވެފައިވާކަމަށްވެސް ފިނޭންސް މިނިސްޓްރީގެ ބަޔާނުގައިވެއެވެ. މިގޮތުން މި ލޯންގެ ދަށުން 15 މިލިޔަން ރުފިޔާ މިފްކޯއަށް ދޫކޮށްފައިވާއިރު ލޯނުގެ ކުރިއަށްއޮތް ތިން މަސްދުވަހަށް ވާ ބައި ދޫކުރުމަށް ހަމަޖެހިފައިވާކަމަށްވެސް ފިނޭންސް މިނިސްޓްރީން ބުނެއެވެ.
މީގެ އިތުރުން ސަރުކާރުގެ މަސްވެރިކަމުގެ ސިޔާސަތުގެ ދަށުން 100 އިންސައްތަ ވެލިއު އެޑިޝަނަށް މިފްކޯ ގެންދިއުމަށް އިތުރަށް ކުރަންޖެހޭ އިންވެސްޓްމަންޓް ކަމުގައިވާ 15 މިލިއަން ޑޮލަރުގެ ތެރެއިން 3 މިލިއަން ޑޮލަރު ލޯނެއްގެ ގޮތުގައި މިފްކޯއަށް ދިނުމަށް އެއްބަސްވެފައިވާއިރު މިހާތަނަށް ކުރެވިފައިވާ މަސައްކަތްތަކަށް ނަވާވީސް މިލިއަން ތިން ސަތޭކަ އައްޑިހަ އެއް ހާސް ފަސް ސަތޭކަ ސަތާރަ ރުފިޔާ މިފްކޯއަށް ދޫކޮށްފައިވާކަމަށްވެސް ފިނޭންސް މިނިސްޓްރީން ބުނެއެވެ.
އަދި ބާކީ 12 މިލިއަން އެމެރިކާ ޑޮލަރުގެ ލޯން، މިފްކޯއަށް ހަމަޖައްސައި ދިނުމަށް ވާންޖެހޭ އެންމެހައި ކަންކަން ނިންމައި މިފްކޯއަށް އަންގާފައިވާކަމަށްވެސް ފިނޭންސް މިނިސްޓްރީން ބުނެއެވެ. އަދި މިފްކޯއިން އެފައިސާ ޚަރަދު ކުރަން ތައްޔާރުވީހާ އަވަހަކަށް އެ ފައިސާވެސް ދޫކުރާ ގޮތަށް ހަމަޖެހިފައިވާކަމަށް ފިނޭންސް މިނިސްޓްރީގެ ބަޔާނުގައި ވެއެވެ.
ފިނޭންސް މިނިސްޓްރީން ބުނީ ފާއިތުވި 5 އަހަރު ދުވަހުގެ ތެރޭގައި މިފްކޯގެ ފެލިވަރު ކޭނަރީން ދުވާލެއްގެ މައްޗަށް 50 ޓަނުގެ މަސް ޕްރޮސެސް ކުރެވޭ މިންވަރަށް ތަރައްޤީ ކުރެވިފައިވާކަމަށާއި ޔޫރަޕާއި އެމެރިކާއަށް އެކްސްޕޯރޓް ކުރެވޭ ފެންވަރަށް ކޭނަރީ ސަރޓިފައިކޮށް އެކްސްޕޯރޓް ކުރަން ފަށާފައިވާކަމަށްވެސް ފިނޭންސް މިނިސްޓްރީގެ ބަޔާނުގައިވެއެވެ.
ސަރުކާރުގެ މަސްވެރިކަމުގެ ސިޔާސަތުގެ ދަށުން 100 އިންސައްތަ ވެލިއު އެޑިޝަން އަށް މިފްކޯ ގެންދިއުމަށް އިތުރަށް ކުރަންޖެހެއެވެ. އަދި އިންވެސްޓްމަންޓް ކަމުގައި ވާ 12 މިލިއަން އެމެރިކާ ޑޮލަރުގެ ލޯން މިފްކޯއަށް ހަމަ ޖައްސައި ދިނުމަށް ވާންޖެހޭ އެންމެހައި ކަންކަން
ނިންމާ ފިނޭންސް މިނިސްޓްރީން ވަނީ އެކަން މިފްކޯއަށް އަންގާފައެވެ.