ރައްޔިތުން މަޖިލީހަށް އިންތިޚާބުވާއިރު މެންބަރުން ތިބި ޕާޓީ ބަދަލުކޮށްފިނަމަ ނުވަތަ ޕާޓީން ވަކިކޮށްފިނަމަ ރައްޔިތުން މަޖިލީހުގެ މެންބަރު ކަމުން ވަކިވާގޮތަށް ކަނޑައަޅާފައި އޮތް އެންޓި-ޑިފެކްޝަން ޤާނޫނު އުވާލުމަށް ރައްޔިތުންގެ މަޖިލީހުން ފާސްކޮށްފިއެވެ.
އެންޓި-ޑިފެކްޝަން ޤާނޫނު އުވާލުމަށް ފާސްކުރީ މަޖިލީހުގެ މިއަހަރުގެ 3ވަނަ ދައުރުގެ 5ވަނަ ޖަލްސާއަށް ޙާޒިރުވެ ވޯޓުގައި ބައިވެރިވި 54 މެމްބަރުންގެ ތެރެއިން 37 މެމްބަރުންގެ ވޯޓާއެކުއެވެ. މި ޖަލްސާއަށް 74 މެމްބަރުން ޙާޒިރުވިއެވެ. މި ޤާނޫނު އުވާލުމާ ދެކޮޅަށް 17 މެމްބަރުން ވޯޓުދެއްވިއެވެ. ވަކި ގޮތަކަށް ވޯޓު ނުދެއްވާ 5 މެމްބަރަކު ތިއްބެވިއެވެ.
މިޤާނޫނު އުވާލުމަށް ރައްޔިތުންގެ މަޖިލީހަށް ބިލެއް ހުށަހެޅުއްވީ ވިލުފުށި ދާއިރާގެ މެމްބަރު ރިޔާޒް ރަޝީދެވެ. އޭނާއަކީ ޕީޕީއެމްގެ ޕާލަމެންޓްރީ ގްރޫޕުގެ ނައިބު ލީޑަރެވެ.