ތިން އަހަރަށްވުރެ ގިނަދުވަހު އިނގިރޭސިވިލާތުގެ ޙިމާޔަތުގައި ރާއްޖެއިން ބޭރުގައި ދިރިއުޅުއްވުމަށްފަހު ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ރާއްޖެ ވަޑައިގެންފިއެވެ.
ރައީސް ނަޝީދު މާލެ ވަޑައިގެންނެވިއިރު، އެމަނިކުފާނަށް މަރުޚަބާ ދެންނެވުމަށްޓަކައި އެތައް ސަތޭކަ ރައްޔިތުންނެއް ވަނީ މާލޭގެ މަގުތަކަށް ނިކުމެފައެވެ.
ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ރާއްޖޭން ބޭރުގައި އަހަރުތަކެއް ހޭދަކުރެއްވުމަށްފަހު އެނބުރި ރާއްޖެވަޑައިގެންފައިވަނީ އިންތިޙާބީ ރައީސް ޢިބްރާހީމް މުޙައްމަދު ޞާލިޙާ، އެމްޑީޕީގެ އިސްބޭފުޅުންނާއެކުއެވެ. ރައީސް ނަޝީދު ދަތުރުކުރެއްވި ފްލައިޓުން ރަންވޭއަށް ފައިބައިވަޑައިގަތުމާއެކު އެމަނިކުފާނަށް އެންމެ ފުރަތަމަ މަރުޙަބާ ކިޔާފައިވަނީ އެމަނިކުފާނުގެ މަންމާފުޅާއި އެމް.ޑީ.ޕީގެ ލީޑަރޝިޕްގެ އިސްބޭފުޅުންނެވެ.
އެއަށްފަހު އެއަރޕޯޓުގެ ވީ.އައި.ޕީ ލައުންޖުން އެމަނިކުފާނަށް މަރުޚަބާ ދެންނެވީ ގުޅިފައިވާ ޕާޓީތަކުގެ އިސްވެރިން ބޭފުޅުންނާއި، ރައްޔިތުންގެ މަޖިލީހުގެ މެމްބަރުންނެވެ.
އިނގިރޭސިވިލާތުގެ ހިމާޔަތް ހޯއްދަވައިގެން ގާތްގަނޑަކަށް 3 އަހަރު ދުވަހު ރާއްޖޭން ބޭރުގައި އުޅުއްވުމަށްފަހު، ރައީސް ނަޝީދު އެނބުރި ރާއްޖެވަޑައިގެންނެވިއިރު، އެމަނިކުފާނުގެ އަރިހުގައި އަނބިކަނބަލުން ލައިލާ ޢަލީވެސް ވަނީ ރާއްޖެވަޑައިގެންފައެވެ. ހުޅުލެއިން މާލެއަށް އެމަނިކުފާނު ވަޑައިގެންފައިވަނީ ކަނޑުމަގުންނެވެ.
ރައީސް ނަޝީދާއި، އިންތިޙާބީ ރައީސް އިބްރާހީމް މުޙައްމަދު ޞާލިޙު ދަތުރުކުރެއްވި ލޯންޗުކޮޅު މާލެ ދަތުރުކުރަމުންދިޔައިރު، ރައީސް ނަޝީދަށް މަރުޚަބާ ދެންނެވުމަށް ކަނޑުމަތީގައިވެސް ޙާއްސަ ހަރަކާތްތަކެއް ކުރިއަށްދިޔައެވެ.
ރައީސް ނަޝީދާއި، އެމަނިކުފާނުގެ ޓީމު މާލެވަޑައިގަތުމުން، އިއްޒުއްދީން ފާލަމުން މާލޭ ސިޓީގެ މޭޔަރާއި، މާލެ ސިޓީ ކައުންސިލް މެމްބަރުންގެ އިތުރުން އެމް.ޑީ.ޕީގެ އިސް ސަފުގައި ހަރަކާތެރިވާ ފަރާތްތަކުން ހޫނު މަރުޙަބާއެއް ދެންނެވިއެވެ.
މާލެ ފައިބައިވަޑައިގަތުމަށްފަހު އިއްޒުއްދީން ފާލަމުން އާޓިފިޝަލް ބީވޗާ ހަމައަށް ވަޑައިގަންނަވަންދެން މަގުމަތީގައި ޚާއްސަ ހަރަކާތްތަކެއް ކުރިއަށްދިޔައެވެ. މިގޮތުން ޗާންދަނީމަގުން، ރީފްސައިޑް ކަންމަތިން ފެށިގެންގޮސް މަޖީދީމަގުން އާޓިފިޝަލް ބީޗާހަމައަށް އެމަނިކުފާނަށް މަރުހަބާކިޔުމަށްޓަކާ ތަފާތު ޝުޢޫރުތައް ލިޔެފައިވާ ބެނާތަކާއި، ރީނދޫކުލައިގެ ދިދަތަކާއެކު ވަރަށް ގިނަ އަދަދެއްގެ އެމް.ޑީ.ޕީގެ ސަޕޯޓަރުންނާއި، އެމަނިކުފާނަށް ތާޢީދުކުރައްވާ ފަރާތްތަކުން ހަރަކާތްތެރިވިއެވެ.
ރައީސް ނަޝީދުގެ މައްޗަށް 13 އަހަރުގެ ޖަލު ހުކުމެއް އިއްވާފައިވަނީ ކްރިމިނަލް ކޯޓުގެ ގާޒީ އަބްދުﷲ މުހައްމަދު ހައްޔަރު ކުރަން އަމުރުކުރި މައްސަލައިގައި ޓެރަރިޒަމްގެ ކުށް އެމަނިކުފާނުގެ މައްޗަށް ސާބިތުވުމާއި ގުޅިގެންނެވެ. ނަމަވެސް އެ މައްސަލަ އަލުން ރިވިއުކޮށްދިނުމަށް އެދި ޕީޖީ އޮފީހުން ސުޕްރީމް ކޯޓަށް ހުށަހެޅުމުން، އެކަމާމެދު އެ ކޯޓުން ވަކިގޮތެއް ނިންމަވަންދެން، ރައީސް ނަޝީދުގެ މައްޗަށް އިއްވާފައިވާ ޖަލު ހުކުމް ތަންފީޒުނުކުރުމަށް އަންގާ ސުޕްރީމް ކޯޓުން ވަނީ ވަގުތީ އަމުރެއް ނެރުއްވާފައެވެ. އެހެންކަމުން އެމަނިކުފާނު ރާއްޖެވަޑައިގެންނެވީ މިނިވަނެއްގެ ގޮތުގައެވެ.
ރައީސް ނަޝީދު މާލެ ވަޑައިގަތުމުން ހޫނު މަރުޙަބާއެއް ދެންނެވިއިރު، މިރޭވެސް އެމަނިކުފާނަށް މަރުޚަބާ ދެންނެވުމަށް ޚާއްސަ ހަރަކާތްތަކެއް ބޭއްވުމަށް ހަމަޖެހިފައިވާކަމަށް އެމްޑީޕީން ބުނެއެވެ.