އިންތިޚާބީ ރައީސް އިބްރާހިމް މުހައްމަދު ސާލިޙު މަޤާމު ހުވާ ކުރައްވާނީ ނޮވެމްބަރުމަހުގެ 17 ވަނަ ދުވަހުކަމަށް ރައްޔިތުންގެ މަޖިލީހުން ފާސްކޮށްފިއެވެ.
އިބްރާހީމް މުޙައްމަދު ޞާލިޙް ހުވާ ކުރައްވާ ދުވަހަކީ ނޮވެމްބަރު މަހުގެ 17 ވަނަ ދުވަސްކަމަށް ރައްޔިތުންގެ މަޖިލީހުން ފާސްވީ އެކަމަށްޓަކައި ނެގި ވޯޓުގައި ބައިވެރިވި 63 މެމްބަރުންގެ އިއްތިފާޤުންނެވެ.
އިންތިޚާބީ ރައީސް އިބްރާހީމް މުޙައްމަދު ޞާލިޙް ހުވާކުރައްވާ ޖަލްސާ ބާއްވާނެ ދުވަހެއް މަޖިލީހުން ކަނޑައަޅާފައި މިވަނީ، މަޖިލީހުގެ ރިޔާސަތުން އެމައްސަލަ މަޖިލީހުގެ ތަޅުމަށް ހުށަހެޅުމުންނެވެ. މިމައްސަލައަށް މަޖިލީހުގެ ތަޅުމުން ގޮތެއް ނިންމުމުގެ ކުރިން، މަޖިލީހުގެ މެމްބަރުން ވަނީ މިމައްސަލައަށް ބަހުސްކޮށްފައެވެ.
މަޖިލީހުގެ ތަޅުމުގައި މިމައްސަލައަށް ވޯޓަށް އެހުމުގެ ކުރިން، މަޖިލީހުގެ ވަގުތީ ކޮމިޓީއަކުން ވަނީ މައްސަލަ ދިރާސާކޮށްފައެވެ. ކޮމިޓީންވެސް ނިންމާފައިވަނީ، ނޮވެމްބަރު 17 ވަނަ ދުވަހު އިންތިޚާބީ ރައީސް ހުވާކުރައްވާ ގޮތަށެވެ.