ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު އިލްހާމް އަޙްމަދާއި، ތިނަދޫ އުތުރު ދާއިރާގެ މެންބަރު ސަޢުދުﷲ ހިލްމީގެ މެންބަރުކަމުގެ ގޮނޑިގެއްލިފައިވާކަމަށް އިލެކްޝަންސް ކޮމިޝަނުން ކަނޑައެޅި މައްސަލައިގެ ޝަރީއަތުގެ އަޑުއެހުންތައް ނިންމާލައިފިއެވެ.
ރައްޔިތުންގެ މަޖިލީހުގެ މެންބަރުކަމުގެ ގޮނޑިގެއްލިފައިވާކަމަށް އިލެކްޝަންސް ކޮމިޝަނުން ކަނޑައެޅި މެންބަރުންގެ ފަރާތުން ދުސްތޫރީ މައްސަލަތަކެއްގެގޮތުގައި ވަކިވަކިން ސުޕްރީމް ކޯޓަށް ހުށައަޅާފައިވާ މައްސަލަތަކުގެ ތެރެއިން ކުރިއަށް ގެންގޮސްފައިވަނީ މެންބަރު އިލްހާމާއި، ސައުދުއްﷲ ގެ ފަރާތުން ހުށައަޅާފައިވާ ދެ މައްމައްސަލައެވެ.
އިލްހާމްގެ ފާރާތުން ހުށައެޅި މައްސަލައިގައި ޝަރީޢަތުގެ މަޖިލީހުގައި އުއްތަމަ ފަނޑިޔާރުވަނީ އިލެކްޝަންސް ކޮމިޝަނުގެ ވަކީލަށް ތަފާތު ގިނަ ސުވާލުތަކެއް ކުރައްވާފައެވެ. މިމައްސަލައިގެ އަޑުއެހުންތައް ނިންމާލިއިރު، އިލްހާމްގެ ވަކީލުވަނީ އިލްހާމްގެ ގޮނޑި ގެއްލޭނެ އަސާސެއް ނެތް ކަމަށް ކަނޑައަޅައި ދިނުމަށް މައްސަލަ ބައްލަވާ ބެންޗުގައި އެދިވަޑައިގެންފައެވެ.
ސައުދުﷲ ގެ ގޮނޑީގެ މައްސަލައިގެ ޝަރީއަތުގެ މަޖިލީހުގައި އޭނާގެ ވަކީލު ވިދާޅުވެފައިވަނީ އިލެކްޝަންސް ކޮމިޝަނުން އަމަލު ކުރީ ސުޕްރީމް ކޯޓުގެ ހުކުމާއި އަމުރާ ޚިލާފަށްކަމަށެވެ.
މި ދެމެންބަރުންގެ މައްސަލައިގެވެސް އަޑުއެހުންތައް ނިންމާލާފައިވާއިރު، ދެން އޮންނާނީ މައްސަލައިގަ ހުކުމް އިއްވުމެވެ. އެހެންނަމަވެސް ޙުކުމް އިއްވާނެ ތާރީޚެއް ސުޕުރީމް ކޯޓުން އަދި ހާމަކޮށްފައި ނުވެއެވެ.
ރައްޔިތުންގެ މަޖިލީހުގެ މެންބަރުންގެ ތެރެއިން ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅި 12 މެންބަރުންގެ ތެރެއިން ތުލުސްދޫ ދާއިރާގެ މެންބަރު މުޙައްމަދު ވަހީދާއި، ދިއްދޫ ދާއިރާގެ މެމްބަރު އަބްދުއްލަތީފް މުހައްމަދާއި، ވިލިނގިލީ ދާއިރާގެ މެންބަރު ސައުދު ޙުސައިންގެ އިތުރުން މަޑުއްވަރި ދާއިރާގެ މެންބަރު މުޙައްމަދު އަމީތުގެ ގޮނޑި ނުގެއްލޭކަމަށް މިމަހުގެ ކުރީކޮޅު ސުޕުރީމް ކޯޓުންވަނީ ހުކުމްކޮށްފައެވެ.