ވެރިކަން ބަދަލުކުރުމުގެ ކަންކަމުގައި އޭސީސީގެ ފުރިހަމަ އެއްބާރުލުން ލިބޭނެ - އިންތިޚާބީ ރައީސްގެ އޮފީސް
ވެރިކަން ބަދަލުކުރުމުގެ މަރުޙަލާގައި ކުރަންޖެހޭ އެންމެހައި ކަންކަމުގައި އެންޓި ކޮރަޕްޝަން ކޮމިޝަން (އޭސީސީ) ގެ ފުރިހަމަ އެއްބާރުލުން އާ ސަރުކާރަށް ލިބޭނެކަމުގެ ފުރިހަމަ ޔަޤީންކަން އެކޮމިޝަނުން ދީފައިވާކަމަށް އިންތިޚާބީ ރައީސްގެ އޮފީހުން ހާމަކޮށްފިއެވެ.
އެއޮފީހުން މިކަން ހާމަކުރީ ޑިރެކްޓަރ ޖެނެރަލް އޮފް ޓްރާސްޝިސަން އަޙްމަދު ލަޠީފް އޭސީސީގެ މެމްބަރުންނާއެކު ބޭއްވި ބައްދަލުކުރެއްވުމަކަށްފަހު ޢާއްމުކުރެއްވި ބަޔާނެއްގައެވެ.
އޭސީސީގައި ބޭއްވި މި ބައްދަލުކުރެއްވުމުގައި، ވަނީ ވެރިކަން ބަދަލުކުރުމުގެ މަރުޙަލާއާ ގުޅޭގޮތުން އެންޓި ކޮރަޕްޝަން ކޮމިޝަންގެ ފަރާތުން ކުރަންޖެހޭ އެންމެހައި މަސައްކަތްތައް ވިހާވެސް އޮމާންކަމާއެކު ކުރިއަށް ގެންދިއުމަށް އެކޮމިޝަނުގެ ފުރިހަމަ އެއްބާރުލުން އައު ސަރުކާރަށް ދޭނެކަން ހާމަކޮށްފައިކަމަށްވެސް އިންތިޚާބީ ރައީސްގެ އޮފީހުގެ ބަޔާނުގައި ބުނެފައިވެއެވެ. މީގެ އިތުރުން، އައު ސަރުކާރަށް މާލީގޮތުން އިތުރު އެއްވެސް ބުރައެއް އުފުއްލަންޖެހޭނެފަދަ ޢަމަލެއް ކުރުމުގެ ފުރުޞަތެއް ނުދޭނެކަމަށާ، އެކޮމިޝަނުގެ ކަނޑައެޅިފައިވާ އުސޫލުތަކާއި ޤަވާއިދުތަކާ ޚިލާފަށް އެފަދަ ޢަމަލެއް ހިނގާނަމަ އެ މައްސަލައެއް ބަލާނެކަމުގެ ޔަޤީންކަންވެސް އޭސީސީން ދީފައިވާކަމަށް އެބަޔާނުގައި ބުނެފައިވެއެވެ.
އިންތިޤާލީ މަރުހަލާގެ ތެރޭގައި، އައު މަޝްރޫޙުތައް ޓެންޑަރއަށް ހުޅުވައިނުލުމަށާއި، އައު މަޝްރޫތައް ނުފެށުމަށާއި އަދި ދައުލަތުން މާލީ ޒިންމާއެއް އުފުލަންޖެހިދާނެ ފަދަ އެއްވެސް މުޢާމަލާތެއް ނުހިންގުމަށްވެސް އިންތިޙާބީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވަނީ ދައުލަތުގެ ހުރިހާ ވުޒާރާތަކަށާއި ކުންފުނިތަކަށް، ޑިރެކްޓަރ ޖެނެރަލް އޮފް ޓްރާސްޝިސަން މެދުވެރިކޮށް
އިލްތިމާސްކުރައްވާފައެވެ.