އައްޑޫސިޓީ މަރަދޫގައި ރޭ ހިނގި މާރާމާރީގައި އަނިޔާވި ޒުވާނާގެ ހާލު ސީރިއަސްވުމާގުޅިގެން މާލެ ގެނެއުމުގެ މަސައްކަތް ކުރަމުންދާ ކަމަށް ހިތަދޫ ރީޖަނަލް ހޮސްޕިޓަލް އިން ބުނެފިއެވެ.
ހިތަދޫ ރީޖަނަލް ހޮސްޕިޓަލް ހިންގެވުމާއި ހަވާލުވެގެން ހުންނެވި ސީނިއާ ކޮމިއުނިޓީ ހެލްތު އޮފިސަރ މުޙައްމަދު ނަޖީބް ވިދާޅުވީ، ރޭގެ މާރާމާރީގައި އަނިޔާވި އުމުރުން 25އ. ޒުވާނަކާއި އުމުރުން 22އ. ޒުވާނެއް ރޭ 11:30 ހާއިރު އެ ހޮސްޕިޓަލަށް ގެނެސްފައިވާ ކަމަށެވެ. އަދި މީގެ ތެރެއިން 25 އަހަރު ޒުވާނާގެ ބޮލަށް ބޮޑެތި އަނިޔާތަކެއްވެފައިވާއިރު، ދެވަނަ މީހާގެ ގައިގެ އެކި ތަންތަނަށް ތޫނު އެއްޗަކުން ހަމަލާ ދީފައިވާ ކަމަށެވެ.
ހިތަދޫ ރީޖަނަލް ހޮސްޕިޓަލުން ބުނީ މީގެތެރެއިން 22 އަހަރުގެ ޒުވާނާގެ ހާލު ސީރިއަސްކަމަށާ މިވަގުތު އެނާއަށް ފަރުވާ ދެމުންދަނީ ވެންޓިލޭޓަރގެ އެހީގައިކަމަށެވެ. އަދި އިތުރު ފަރުވާދިނުމަށްޓަކައި މިއަދު މެނދުރުފަހު މާލެ ގެނައުމަށް މަސައްކަތްކުރަމުންދާކަމަށެވެ.
މަރަދޫގައި ރޭ ހިނގި މި މާރާމާރީއާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށް ފުލުހުން ބުނެއެވެ. ފުލުހުން ދަނީ މިކަން ތަހުޤީޤު ކުރަމުންނެވެ.