ބ. އަތޮޅުން ފެށިގެން ތ. އަތޮޅާއި ދެމެދުގެ ރަށްތަކަށާއި އައްޑޫ ސިޓީ ހިމެނޭ ސަރަޙައްދަށް މޫސުން ގޯސްވާނެތީ ޔެލޯ އެލާޓް ނެރެފިއެވެ.
މޯލްޑިވްސް މީޓިއޮރޮލޮޖިކަލް ސަރވިސުން ވިދާޅުވީ ރާއްޖެއަށް މިހާރު ކުރަމުންދާ ވިއްސާރައިގައި ބ.އަތޮޅުން ފެށިގެން ތ.އަތޮޅާ ދޭތެރޭގައި ހިމެނޭ އަތޮޅުތަކަށާއި އައްޑޫ ސިޓީ ހިމެނޭ ސަރަޙައްދަށް ގަޑިއަކު 27 މޭލާ 37 މޭލާ ދެމެދުގެ ބާރުމިނަކަށް ވައިޖެހި، ވިލާގަނޑުގައި 50 މޭލަށް ވައިގަދަވާނެކަމަށެވެ. މީގެ އިތުރުން ރާއްޖޭގެ ބޮޑުބަޔަކަށް ވާރޭވެހި ވައިގަދަވާނެކަމަށްވެސް މޯލްޑިވްސް މީޓިއޮރޮލޮޖިކަލް ސަރވިސުން ލަފަކުރެއެވެ. އަދި ދިޔަވަރު ބޮޑުވާ ވަގުތުތަކުގައި ދެކުނާއި މެދުތެރޭގެ ބައެއް ރަށްތަކަށް އުދައެރުން އެކަށީގެންވާކަމަށްވެސް މީޓިއޮރޮލޮޖިކަލް ސަރވިސުން ލަފަކުރެއެވެ.
އެހެންކަމުން ކަނޑުދަތުރުކުރައްވާ ފަރާތްތަކުން މޫސުމަށް ވަރަށް ބޮޑަށް ސަމާލުވުމަށް މޯލްޑިވްސް މީޓިއޮރޮލޮޖިކަލް ސަރވިސުން އިލްތިމާސްކުރެއެވެ. ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި ވޭތުވެދިޔަ 24 ގަޑިއިރު ކަނޑުމަތީގެ ދެ ހާދިސާ އެމްއެންޑީއެފައަށް ރިޕޯޓްކޮށްފައިވެއެވެ. އަދި ވިއްސާރާގައި މިހާތަނަށް އެއްވެސް ރަށަކަށް ގެއްލުމެއް ލިބިފައިނުވާއިރު ޑިޒާސްޓަރ މެނޭޖްމަންޓް ސެންޓަރުން ގެންދަނީ ރަށްތަށް މޮނިޓަރ ކުރަމުންނެވެ.