ރައްޔިތުންގެ ނިންމުމާ ދެކޮޅު ހަދާ، ޤައުމު ހަލަބޮލިކުރުމަށް މަސައްކަތް ނުކުރުމަށް އިންތިޚާބީ ރައީސް އިބްރާޙީމް މުޙައްމަދު ޞާލިޙު ގޮވާލައްވައިފިއެވެ.
ކުރީގެ ރައީސް މަޢުމޫން ޢަބްދުލްޤައްޔޫމާއެކު ބޭއްވި ބައްދަލުކުރެއްވުމަށްފަހު ނޫސްވެރިންނާއި ބައްދަލުކުރައްވާ ވާހަކަފުޅުދައްކަވަމުން އިންތިޚާބީ ރައީސް ވިދާޅުވީ، އިންތިޚާބުގެ ނަތީޖާ ޤަބޫލުފުޅު ކުރެއްވުމަށްފަހު ދެން މަގުމައްޗަށް ނިކުމެވަޑައިގަތުމަކީ ޤަބޫލުކުރެވޭނެ ކަމެއްނޫން ކަމަށެވެ. އަދި އެއީ ޤައުމު ޙަލަބޮލި ކުރުމުގެ ގޮތުން ކުރާ މަސައްކަތެއްކަމަށް އިންތިޚާބީ ރައީސް ސިފަކުރެއްވިއެވެ.
"އަޅުގަނޑު ވަރަށް އިޚްލާސްތެރިކަމާ އެކު ރައީސް ޔާމީނަށް ދަންނަވާލަން ބޭނުން ވަނީ، އެމަނިކުފާނު އިސްވެ ހުންނަވައިގެން މާޙައުލު ހަލަބޮލިކުރަން މަސައްކަތްޕުޅު ނުކުރައްވާށޭ. އެއަކަށް އަޅުގަނޑުމެން އަދި ރައްޔިތުން ވެސް ތިބީ ތަންދޭކަށެއް ނޫނޭ،" އިބްރާޙީމް މުޙައްމަދު ޞާލިޙު ވިދާޅުވި އެވެ.
އިބްރާޙީމް މުޙައްމަދު ޞާލިޙު ވިދާޅުވީ 23 ސެޕްޓެމްބަރުގައި ދިވެހި ރައްޔިތުން ގޮތެއް ނިންމައިފިކަމަށާއި ރައްޔިތުން ތިބީ އެ ނިންމުމާއެކު ކުރިއަށް ދިއުމަށްކަމަށެވެ. އެހެންކަމުން ސަލާމަތީ ބާރުތަކުން ވެސް ދިވެހި ރައްޔިތުންގެ އެ ނިންމުން ދަމަހައްޓަން މަސައްކަތް ކުރަންޖެހޭނެކަމަށް އިބްރާޙީމް މުޙައްމަދު ޞާލިޙު ފާހަގަކުރެއްވިއެވެ.
"ވަރަށް ސާފުކޮށް އެނގެން އެބައޮތް، އެއްވެސް ދާއިރާއެއްގައި، ވޯޓަށް ނުފޫޒު ފޯރާނެ، އަދި ބަދަލުވާނެ އެއްވެސް ކަމެއް އެ ދުވަހު ހިނގާފައި ނެތް ކަން. އޭގެ އަލީގައި އިލެކްޝަންސް ކޮމިޝަނުން ނަތީޖާ އިޢުލާންކޮށްފައި ވަނީ. އެއާއެކު ހަފުތާއެއްވެގެން ދިޔައިރު ވެސް އެފަދަ ޝަކުވާއެއް، ރިޕޯޓެއް ވެސް ހުށަހަޅާފައި ނުވޭ،" އިންތިޚާބީ ރައީސް ވިދާޅުވި އެވެ.
ރައްޔިތުންގެ ނިންމުމާ ދެކޮޅު ހަދާ، ޤައުމު ހަލަބޮލިކުރުމަށް މަސައްކަތް ނުކުރުމަށް އިބްރާހިމް މުހައްމަދު ސާލިހު ގޮވާލާފައިވާއިރު، ޕީޕީއެމުން ދަނީ އިންތިޚާބުގައި މައްސަލަތަކެއް ހުރިކަމަށް ބުނެ ކަންބޮޑުވުން ފާޅުކުރަމުންނެވެ.