ކެރަލާގައި ހާލުގައި ޖެހިފައިވާ މީހުންނަށް ދިވެހި ސަރުކާރުން 50،000 ޑޮލަރުގެ އެހީއެއް ދޭން ނިންމައިފި

އިންޑިޔާގެ ކެރަލާ ސްޓޭޓްގައި ފެން ބޮޑުވުމުގެ ސަބަބުން ލިބެމުންދާ ބޮޑެތި ގެއްލުންތަކުން އަރައިގަތުމަށްޓަކައި، 50,000 ޑޮލަރުގެ ފައިސާގެ އެހީއެއް ވުމަށް ދިވެހި ސަރުކާރުން ނިންމަވައިފިއެވެ.

ރައީސް އޮފީހުން ވިދާޅުވީ، ޤައުމީ ހިތާމައިގެ މި ދަނޑިވަޅުގައި، އިންޑިޔާގެ ސަރުކާރަށާއި، ރައްޔިތުންނަށާއި، ޚާއްޞަކޮށް މި ހާދިސާގައި ގެއްލުން ލިބިފައިވާ ފަރާތްތަކަށް ދިވެހި ސަރުކާރުގެ ފަރާތުން ހަމްދަރުދީ ފޮނުއްވައި، ހާދިސާގައި މަރުވެފައިވާ މީހުންގެ ޢާއިލާތަކަށް ތައުޒިޔާ ފޮނުއްވާކަމަށެވެ.

މި މަހުގެ 8 ވަނަ ދުވަހުން ފެށިގެން ކެރަލާ ސްޓޭޓަށް ކުރަމުންދާ ގަދަ ވިއްސާރައާއި ފެން ބޮޑުވުމުގެ ހާދިސާގައި 200 އެއްހާ މީހުން މަރުވެ، 6 ލައްކަ އަށްވުރެ ގިނަ މީހުންގެ ގެދޮރު ގެއްލިފައިވެއެވެ.