އެމްއެންޔޫއިން ބާއްވާ ރިޔާސީ ބަހުސްގަައި ބައިވެރިވުމުގެ ދަޢުވަތު ރައީސް ޔާމީން ޤަބޫލުކުރައްވައިފި
ދިވެހިރާއްޖޭގެ ޤައުމީ ޔުނިވާސިޓީން ބާއްވާ ރިޔާސީ ކެނޑިޑޭޓުންގެ ބަހުސްގައި ބައިވެރިވެވަޑައިގަތުމަށް ދެއްވި ދަޢުވަތު، ޕީޕީއެމްގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ޤަބޫލުކުރައްވައިފިއެވެ.
"އެމްއެންޔޫ ރިޔާސީ ބަހުސް 2018" ގެ ނަމުގައި މިފަހަރުގެ ރިޔާސީ ބަހުސް އިންތިޒާމްކޮށް ބޭއްވުމަށް ހަމަޖެހިފައިވަނީ ދިވެހިރާއްޖޭގެ ޤައުމީ ޔުނިވާސިޓީންނެވެ. މިފަހަރުގެ ރިޔާސީ ބަހުސަކީ ޢިލްމީ އަދި ހުރިހާ ގޮތަކުންވެސް ރައްޔިތުން ބަލައިގަންނަ ބަހުސަކަށް ހެދުމަށްޓަކައި ބަހުސްގެ ސުވާލުތައް ތައްޔާރުކުރުމާއި، ކެނޑިޑޭޓުންނާއި ގުޅުންހުރި ކަންކަމުގެ މުޢާމަލާތު ކުރުމާއެކު ބަހުސް ހުށައަޅާނެ ފަރާތެއްވެސް ކަނޑައެޅުމަށް ހަމަޖެހިފައިވަނީ ޤައުމީ ޔުނިވަރސިޓީންނެވެ.
ޕީޕީއެމްގެ ނާއިބުރައީސް ޢަބްދުއްރަޙީމް ޢަބްދުﷲ ކުރެއްވި ޓްވީޓެއްގައި ވިދާޅުވީ، މި ބަހުސްގައި ބައިވެރިވުމަށް އެމްއެންޔޫއިން ދިން ދަޢުވަތު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ޤަބޫލުކުރައްވާފައިވާކަމަށެވެ. މިބަހުސްގައި ބައިވެރިވުމުގެ ދަޢުވަތު އެންމެ ފުރަތަމަ ޤަބޫލުކުރެއްވީ ރައީސް ޔާމީނެވެ.
މި ފަހަރުގެ ރިޔާސީ ބަހުސް ގެނެސް ދިނުމަށް މަސައްކަތް ކުރަމުންދަނީ ތިން ފިޔަވައްސަކަށެވެ. އެގޮތުން މިހިގާ އޮގަސްޓް މަހުގެ ތެރޭގައި މެނިފެސްޓޯ ބަހުސް ބާއްވާއިރު ރަނިންގ މޭޓުންގެ ބަހުސް ގެނެސްދޭނީ ސެޕްޓެމްބަރު މަހުއެވެ. އަދި ރިޔާސީ ކެނޑިޑޭޓުންގެ ބަހުސް ގެނެސްދޭނީ އިންތިޚާބުގެ 10 ވަރަކަށް ދުވަސްކުރިންނެވެ.
ޤައުމީ ޔުނިވަރސިޓީން އިންތިޒާމުކުރާ "އެމްއެންޔޫ ރިޔާސީ ބަހުސް 2018" އާއި "މެނިފެސްޓޯ ބަހުސް 2018" ގެ މީޑިއާ އަދި މާކެޓިންގ ޕާޓްނަރަކަށް ޕީއެސްއެމް ހަމަޖައްސައި މިކަމާބެހޭ އެއްބަސްވުމެއްގައި ދެފަރާތުން ވަނީ ސޮއިކޮށްފައެވެ.