ވައިގެ މަގުން ހދ. މަކުނުދޫއަށް ދެވޭނެ ގޮތް ހައްދަވައިދެއްވާނެކަމަށް އިދިކޮޅު ކެނޑިޑޭޓް ވިދާޅުވިއިރު، ރައީސުލްޖުމްހޫރިއްޔާ އަބްދުﷲ ޔާމީން ޢަބްދުލްޤައްޔޫމް ވަނީ އެމަސައްކަތް ފަށްޓަވާފައިކަމަށް ޓުއަރިޒަމް މިނިސްޓަރ މޫސާ ޒަމީރު ވިދާޅުވެއްޖެއެވެ.
ވައިގެ މަގުން މަކުނުދޫއަށް ދެވޭނެ ގޮތެއް ހޯއްދަވައިދެއްވާނެކަމަށް ވިދާޅުވެ އިދިކޮޅު ކެނޑިޑޭޓް އިބްރާހިމް މުހައްމަދު ސޯލިހު ދެއްކެވި ވާހަކަފުޅުތަކަށް ރައްދުދެއްވަމުން ޓުއަރިޒަމް މިނިސްޓަރ މޫސާ ޒަމީރު ވިދާޅުވީ މަކުނުދޫއަށް ވައިގެ މަގުން ދަތުރުކުރޭނެ ގޮތް ހެދެމުގެ މަސައްކަތް ސަރުކާރުން ފަށާފައިވާކަމަށެވެ. އެގޮތުން މަކުނުދޫ ފަޅުތެރޭގައި ރިސޯޓެއް ހަދަން ބަޔަކާ ހަވާލުކޮށްފައިވާއިރު، އެމަސައްކަތް ނިމޭއިރު ސީ-ޕްލޭން ބޭސްއެއް އެތަނުގައި ޤާއިމްވެފައި އޮންނާނެކަމަށް ޒަމީރު ވިދާޅުވި. އަދި ބިލެއްފަހީގައި ސަރުކާރުން ތަރައްޤީކުރާ އެއަރޕޯޓާކީވެސް މަކުނުދޫ ރައްޔިތުންނަށް ފަޞޭޙަތަކެއް ލިބިގެންދާނެ އެއަރޕޯޓެއްކަން ޒަމީރު ފާހަގަކުރެއްވިއެވެ.
ސަރުކާރުންވެފައިވާ ވަޢުދުތައް ނުވަތަ ސަރުކާރުން ކޮށްފައިވާ ކަންކަން ކުރާނެކަމަށް އިދިކޮޅު ފަރާތްތަކުން ބުނަމުންދާތީ ގިނަ ބައެއްގެ ފާޑުކިޔުން ވަނީ އިދިކޮޅު ކެނޑިޑޭޓަށް އަމާޒުވެފައެވެ. މިގޮތުން ނަރުދަމާ އަޅާފައިވާ ރަށްރަށުގައި ނަރުދަމާ އަޅައި، ބަނދަރު ހަދާފައިވާ ރަށްރަށުގައި ބަނދަރު ހަދާނެކަމަށް ބުނެ ދައްކާ ވާހަކަތަކަށް ގިނަ ބަޔަކު ދަނީ ފާޑުކިޔަމުންނެވެ.