ޒުވާނުންނާއި އަންހެނުން، ލޭ ހަދިޔާކުރުމަށް ހިއްވަރުދިނުމުގެގޮތުން ރަފީ ޖަމްއިއްޔާއިން ބްލަޑް ޑޮނޭޝަން ކޭމްޕެއް ކުރިއަށްގެންގޮސްފިއެވެ.
ސެނަހިޔާ ހޮސްޕިޓަލްގައި ކުރިއަށްގެންދިޔަ ޔޫތް ބްލްޑް ޑޮނޭޝަން ކޭމްޕަކީ ރަފީ ޖަމިއްޔާއިން މިދިޔަ އަހަރުވެސް ކުރިއަށްގެންދިޔަ ކޭމްޕެކެވެ. މިއަހަރުގެ ބްލަޑް ކޭމްޕް ކުރިއަށްގެންގޮސްފައިވަނީ ދާދިފަހުން ހުޅުމާލޭގައި ހިނގި އެކްސިޑެންޓެއްގައި މަރުވި މުޙައްމަދު ޖަޒްލާން ޖަލީލް، "ޖައި ޔޫތް ބްލަޑް ޑޮނޭޝަން"ގެ ނަމުގައެވެ. ރަފީ ޖަމިއްޔާއިން ބުނީ މި ކޭމްޕަކީ ރާއްޖެގައި ތިބި ތެލަސީމިޔާ ކުދިންނަށް ހިލޭ ލޭ ހޯދަދިނުމަށް ކުރިއަށްގެންދާ ހަރަކާތެއްކަމަށާއި މިއީ އަމިއްލައަށް ފެނިގެން ލޭހަދިޔާ ކުރުމަށް މީހުންނަށް ބާރުއެޅުމުގެ ގޮތުން ބޭއްވި ކޭމްޕެއްކަމަށެވެ.
ރަފީ އެންޖީއޯގެ ރައީސް ޑރ. އައިޝަތު ރަފިއްޔާ ވިދާޅުވީ މިއަހަރުގެ ފަހުން އެ ޖަމިއްޔާއިން ބާއްވާ މިފަދަ ކޭމްޕްތައް ބޭއްވުމަށް ހަމަޖެހިފައިވަނީ ޖަޒްލާންގެ ނަމުގައި ކަމަށެވެ. ރަފިއްޔާ ވިދާޅުވީ ޖަޒްލާންއަކީ މިދިޔަ އަހަރު ރަފީ ޖަމިއްޔާއިން ކުރިއަށްގެންދިޔަ މިކޭމްޕާއި، ރަފީ ޖަމިއްޔާގެ އެހެނިހެން ހަރަކާތްތަކުގައި ވަރަށް އިސްކޮށް ހަރަކާތްތެރިވި ކުއްޖެއްކަމަށެވެ.
މިފަހަރުގެ ކޭމްޕްގައި 140 އަށްވުރެ ގިނަ މީހުން ލޭ ހަދިޔާކޮށްފައިވާކަމަށް ރަފީ ޖަމިއްޔާއިން މައުލޫމާތުދެއެވެ.