ރާއްޖޭގެ އެކި ރަށްރަށުގައި މިސަރުކާރުން ތަރައްޤީ ކުރައްވާފައިވާ 50 ފުޓްސަލް ދަނޑު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ހުޅުއްވައިދެއްވައިފިއެވެ.
ރައީސުލްޖުމްހޫރިއްޔާ މި ދަނޑުތައް ރަސްމީކޮށް ހުޅުއްވާދެއްވާފައިވަނީ މިހާރު ދަރުބާރުގޭގައި ކުރިއަށްދާ ޚާއްޞަ ރަސްމިއްޔާތުގައެވެ. ސަރުކާރުން ރާއްޖޭގެ ޒުވާނުންނާއި ކުޅިވަރުގެ ދާއިރާ ހަރުދަނާކޮށް ކުރިއެރުވުމަށް ކުރަމުންދާ މަސައްކަތުގެ ދަށުން މިހާތަނަށް ކުޅިވަރުގެ ދާއިރާގެ ޢުމްރާނީ ތަރައްޤީއަށް 434 މިލިއަން ރުފިޔާ ޚަބަރު ކޮށްފައިވާކަން ރައީސުލްޖުމްހޫރިއްޔާ ވަނީ މިރޭގެ ޖަލްސާގައި ފާހަގަކުރައްވާފައެވެ. އަދި ރާއްޖެގެ އެކި ރަށްރަށުގައި އިތުރު ފުޓްބޯޅަ ދަނޑު ތަރައްޤީކުރުމަށް ސަރުކާރުން ނިންމަވާފައިވާކަންވެސް ރައީސް ވަނީ ހާމަކުރައްވާފައެވެ.
ރައީސްގެ ވާހަކަފުޅުގައި ވަނީ، ޒުވާނުންނާއި ކުޅިވަރުގެ ދާއިރާ ތަރައްޤީކުރުމަށް ސަރުކާރުން ގިނަ މަސައްކަތްތަކެއް ކުރައްވަމުންގެންދަވާއިރު، ކުޅިވަރުގެ ދާއިރާއިން ބައިނަލްއަޤްވާމީ މައިދާނުގައި ރަންވަނަތައް ހާސިލްކުރުމަށް، ކުޅިވަރުގެ ދާއިރާގައި ހަރަކާތްތެރިވާ ޒުވާނުންނަށް ހިތްވަރުދެއްވައި އެކަން ކުރުމަށް އެދިވަޑައިގެންފައެވެ.
ސަރުކާރުން ވަނީ މި ވޭތުވެދިޔަ 4 އަހަރުގެ ތެރޭގައި ރާއްޖޭގެ އެކި ރަށްރަށުގައި 86 ފްޓްސަލް ދަނޑު ތަރައްޤީ ކުރައްވާފައެވެ. އަދި 49 ފްޓްބޯޅަ ދަނޑާއި 93 ބަށި ކޯޓާއި 44 ނެޓްބޯޅަ ކޯޓާއި 11 ބާސްކެޓް ކޯޓުގެ އިތުރުން 83 ވޮލީ ކޯޓު ތަރައްޤީ ކުރައްވާފައެވެ.