ރީރަޖިސްޓްރީ ކުރުމަށް ކުންފުނިތަކާއި އޮފީސްތަކުގެ މުވައްޒަފުން އެހީތެރިވުމަށް ހިތްވަރުދެން - ލޭބަރ
އަންނަ ރިޔާސީ އިންތިޚާބަށް ރީރަޖިސްޓްރީ ކުރުމަށް ކުންފުނިތަކާއި އޮފީސްތަކުގެ މުވައްޒަފުން އެހީތެރިވުމަކީ ލެބަރ ރިލޭޝަންސް އޮތޯރިޓީން ހިތްވަރުދޭކަމެއްކަމަށް އެއޮޓޯރިޓީން ބުނެފިއެވެ. ލެބަރ ރިލޭޝަންސް އޮތޯރިޓީން މިހެން ބުނެފައިވަނީ އެއޮތޯރިޓީން މިރޭ ނެރުނު ނޫސް ބަޔާނެއްގައެވެ.
ލެބަރ ރިލޭޝަންސް އޮތޯރިޓީން ބުނީ އިންތިޚާބުގައި ރީރަޖިސްޓްރީ ކުރުމަކީ ވޯޓްލުމުގެ ހައްޤު ލިބިގަތުމަށް ވީހާވެސް ގިނަބަޔަކު ނިކުތުމަށްދެވޭ ހިތްވަރެއްކަމަށެވެ. އަދި ރީރަޖިސްޓަރ ކުރުމަށް ކުރަންޖެހޭ މަސައްކަތްތައް ލުއިކޮށްދީ ވީހަވެސް ފަސޭހަކަމާއެކު ރީރަޖިސްޓަރ ކުރުމުގެ ކަންތައްތައް ރައްޔިތުންނަށްޓަކައި ފަހިކޮށްދިނުމަށް ކުންފުނިތަކާއި އޮފީސްތަކުގައި މަސައްކަތްކުރާ މުވައްޒަފުން ނިކުމެ މަސައްކަތް ކުރުމަކީ ލޭބަރ ރިލޭޝަންސް އޮތޯރިޓީން ހިތްވަރުދޭކަމެއްކަމަށެވެ.
މިމޭރުމުން ލެބަރ ރިލޭޝަންސް އޮތޯރިޓީން ނޫސްބަޔާނެއް ނެރުނީ މީޑިއާތަކުގައި މުވައްޒަފުން ލައްވާ ސިޔާސީ މަސައްކަތްކުރުވާނަމަ ފިޔަވަޅު އަޅާނެކަމަށް ލެބަރ ރިލޭޝަންސް އޮތޯރިޓީން ބުނެފައިވާކަމަށް ބުނެ ލިޔެފައިވާ ޚަބަރުތަކާއި ގުޅިގެންނެވެ. އެގޮތުން އެއޮތޯރިޓީގެ ބަޔާނުގައި ބުނެފައިވަނީ "މިހާރު" ނޫހާއި މީޑިޔާގެ އެހެން ވަޞީލަތްތަކުގައި އެ ޚަބަރު ޝާޢިއު ކޮށްފައިވަނީ އެއޮތޯރިޓީން ދިން މަޢޫލޫމާތު އޮޅޭ ގޮތަށްކަމަށެވެ. އެހެންކަމުން ޙަގީގަތް އޮޅޭގޮތަކަށް ޚަބަރު ނުފެތުރުމަށްވެސް ލޭބަރ ރިލޭޝަންސް އޮތޯރިޓީން ވަނީ މީޑިޔާތަކަށް ގޮވާލައްވާފައެވެ.