ޓީމްގައި ނެތް ކުޅުންތެރިންގެ ވާހަކަނުދައްކައި ޒުވާން ކުޅުންތެރިންނަށް އިތުބާރުކުރުމަށް ގައުމީ ފުޓްބޯޅަ ޓީމްގެ ކޯޗު ޕީޓާރ ސެގާޓް ސަޕޯޓަރުންގެ ކިބައިން އެދެފިއެވެ.
ސާފް ޗެމްޕިއަންޝިޕަށް ނެގި 30 ކުޅުންތެރިންގެ ސްކޮޑާއިއެކު ގިނަ ބައެއްގެ ފާޑުކިޔުންމިވަނީ ކޯޗަށް އަމާޒުވެފައި. ޚާއްސަކޮށް ކުރީގެ ކެޕްޓަން އަޝްފާގަށް ޓީމުން ފުރުސަތު ނުދިނުމުން އެކަން މިވަނީ އާންމުންގެ މެދުގައި މިހާރު ބޮޑު ބަހުސަކަށްވެފައެވެ.
ސާފް ޗެމްޕިއަންޝިޕުގެ ކުރިން ސަޕޯޓަރުންނަށް ދޭން ބޭނުންވާ މެސެޖުގެ ގޮތުގައި ފާހަގަކުރަމުން ކޯޗު ޕީޓަރ ސެގާޓް ބުނީ އޭޝިއަން ކަޕް ކޮލިފައިންގައި މިދިޔަ މާޗް މަހު ބޫޓާން އަތުން 7-0ން މޮޅުވި މެޗުގައި ޒުވާން ކުޅުންތެރިން ދެއްކި މޮޅު ކުޅުމުގެ ވާހަކަ ނުދައްކާތީ ކަންބޮޑުވުން ފާޅުކުރާކަމަށެވެ. އޭނާ ބުނީ އެ މެޗަކީ 288 ދުވަސްފަހުން ރާއްޖެ މޮޅުވި ފުރަތަމަ މެޗުކަމަށާއި، އެވަރުގެ ބޮޑު މޮޅެއް ހޯދުމުގައި ޒުވާން ކުޅުންތެރިން ދެއްކި މޮޅު ކުޅުމަކީ މިހާރުވެސް ދައްކަން ޖެހޭ ވާހަކައެއްކަމަށެވެ.
އޭނާ ސާފް ޗެމްޕިއަންޝިޕަށް އެކުލަވާލި ސްކޮޑުގައިވެސް އެ މެޗުގައި ކުޅުންތެރިން ދެއްކި ކުޅުމަށް ބެލިކަމަށާއި، މި ކުޅުންތެރިންނަށް އިތުބާރު ކުރުމަށް އޭނާ ގޮވާލިއެވެ. ކޯޗު ސެގާޓް ބުނީ ޓީމްގައި ނެތް ކުޅުންތެރިންގެ ވާހަކަދައްކައިގެން މި ކުޅުންތެރިންނަށް ލިބޭނެ ހިތްވަރެއްވެސް އަދި ފައިދާއެއްވެސް ނެތްކަމަށާއި، އޭގެ ބަދަލުގައި މި ކުޅުންތެރިންނަށް ހިތްވަރުދީ އިތުބާރުކޮށްފިނަމަ ރާއްޖޭގެ ފުޓްބޯޅައިގެ މުސްތަގްބަލް ފެންނާނެކަމަށެވެ.
"އަހަރެން ހަމަ ހައިރާންވޭ އެކަކުވެސް 7-0ން މޮޅުވި މެޗުގެ ވާހަކަ ނުދައްކާތީ. ޒުވާން ކުޅުންތެރިން ދެއްކީ މޮޅު ކުޅުމެއް. އެ ކުޅުންތެރިން ސާފް ޗެމްޕިއަންޝިޕަށްވެސް މި ނެގީ. އެމެޗުގެ ކުރިންވެސް މީހުން ބުނި ޒުވާން ކުޅުންތެރިންނަށް ނުވާނޭ. އެކަމަކު އެމީހުން މޮޅު ކުޅުމެއް ދެއްކި. ކުރިއަށް އޮތް މުބާރާތުގައި އެމީހުން މޮޅު ކުޅުމެއް ދައްކަން ހިތްވަރުދީ. ހެޔޮނުވާނެ! ހުރިހާ ސަޕޯޓަރުން އިތުބާރުކުރަންވީ މިވަގުތު މި ކުޅުންތެރިންނަށް. މިއީ ރައްޖޭގެ މުސްތަގްބަލަކީ" ކޯޗު ބުންޏެވެ.